Shillong, Kyllalyngkot 6 : Ki pulit jongka South West Garo Hills ki la ïoh ban kurup haduh 55 tylli ki kuli siat liengsuiñ kiba la btep ha trai siej ha ka shnong Santogre, South West Garo Hills mynta ka sngi. Kane ka jaka ka hap hapoh ka Salmanpara Police Station.
Ki pulit ki la lap ïa kine ki kuli kiba la buhrieh da kaba bthep shapoh khyndew ha trai siej kiba don haduh 55 tylli bad ki dei ki kuli ba la pyndonkam ha ki tup siat liengsuiñ, ïathuh u SP ka SWGH u Vikash Varma.
ïa kine ki kuli la kurup da ki pulit ha ka jingïadon lang ki nongsakhi bad la pyndep kat kum ki kyndon aiñ.
`Ka jingtohkit ka dang ïaid ban lap nangno kine ki kuli ki wan bad mano ba donkti ban buhrieh ha katei ka jaka, ong u SP.
U SP u kyntu ïaki paidbah ban wan shakhmat bad pyntip mar mar lada ki tip ïa ki briew kiba donkti ha kaba buhrieh ïakitei ki tiar siat.
“ Leit pyntip sha ki pulit station kiba jan tam bad yn ym pyntip paidbah ne ïathuh hano hano ruh ïa kito kiba wan ban pyntip bad na ka liang ki pulit ki la kular ruh ban ai khusnam ïa kito kiba ïarap ban lap ïa kiba donkti” Pynkut u SP.
