Nongstoiñ, Naitung 8: Katba nang mih ki sngi ki kam thok kam shukor ki nang jyllei ha kylleng ki jaka. Dang ha ka hynñiew tarik Naitung ki pulit ka Nongstoiñ ki la ïoh jingtip ba ki don ar ngut ki briew kiba donkti ha kaba leit kylleng kylleng ki jaka da kawei ka kali Eco Van ban tyrwa ïa ki smart television, kiba dei na ka Kompeni Sony TV Bravia sha ki nongshong shnong, ha kaba ki la wan poi ruh sha ki thaiñ Nongstoiñ ban leh ïa katei ka kam thok.
Kumta hadien ba la ïoh ïa ka jingtip ba thikna u Sub Inspector Bah E.Sungoh u la mudui da ka Suo motto FIR, ha kaba ki pulit ki la pynlong ïa ka jingbuddien kaba bniah bha bad ki la pyntip ruh sha Mairang police station ba kin peitngor ban buddien lang ïa kitei ki runar.
Ha ka jingthwet bad buddien bniah, la lap ïa katei ka kali bad la ïoh kem ruh ïa kitei ki runar kiba la suba jur ba ki lah ban dei kiba donkti ha katei ka kam bad la wanrah ïa ki sha Nongstoiñ police station bad ïa ka mokotduma, la register pyrshah ïa ki bad ka jingtohkit mynta ka dang ïaid shakhmat.
