Bym shimkhia u Syiem leit pynkhuid hi ka HYC ïa ki jaboh jabaiñ ba la lum thup ha ïew Rambrai

Nongstoiñ K’lyngkot 04: Ka jingbym shimkhia jong u Syiem ban pynkhuid ïa ki jaboh jabaiñ kiba la lum thup harud ka ïew Rambrai kaba dei ruh ha syndah ki dukan ba ki nongdie juti, jaiñ, ki tiar ïng tiar sem bad kiwei kiwei kaba la wanrah ïa ka jingsma kaba jur bha haduh ki bynta pdeng jong ka ïew ka la pynlong ïa ki nongïalam jong ka Hynñiewtrep Youth Council (HYC) Rambrai Circle ba kin hap ban shim ka jingkitkhlieh da kaba leit pynkhuid bad pynkit da ki kali Mahindra pickup na katei ka jaka bad leit theh ha kiwei pat ki jaka ba lait kiba jngai na ki jaka shong briew.
Katkum u kyrwoh ba la pyllait da u bah K.Nongphud, secretary ka seng la ong ba la bun snem bha, ba ki nongpynkhuid ïa ka ïew ki ju mlien ban lum ïa ki jaboh jabaiñ, ki ñiut ki ñer bad pynlang ha ka jaka kaba la ai jingbit da ka hima bad la shu iehnoh sah kumto khlem da kit bad leit bret sha ki jaka kiba dei ban bret.Nalor kata u la ong ruh ba na ka liang ka seng ka la leit ban ïakynduh ïa u Syiem manla ka por ban kyntu ba u dei ban shimkhia bad ban pynkhuid noh ïa kitei ki jaboh jabaiñ na katei ka jaka ban lait na ka jingsma ïa ki paitbah nongwan ïew bad ki nongshong dukan hynrei haduh mynta mynne u Syiem um shym patiaw ban shimkhia bad kitkhlieh halor kane ka bynta.
U bah Nongphud u la ong ruh ba namar ba ki paitbah nongshong ïew ki la ud la nam bad kyntu ïa ka seng ba kan shimkhia lem kumta, ka seng kam banse ban shim ka jingkitkhlieh bad kumta ha ka sngi siatjaiñ kata ha ka 3 tarik Kyllalyngkot 2026, ki nongïalam bad ki dkhot ka seng ha ryngkat ka jingsynranlang jong u bah Lumlang Kharsyiemlieh president ka HYC West Khasi Hills ki la leit ban sha katei ka jaka ryngkat ki kali Mahindra pickup ban pynkit noh ïa kitei ki jaboh jabaiñ bad ha ka por ba la sdang ban pynkit ïa kitei ki nuit na ka liang u Syiem ka hima Rambrai, u paiem O.Syiemsad, u la wan ban tuklar ha kaba ka la mih ka jingïania kaba jur bha shipor. Na ka liang ka seng kam shym la pynsngap hynrei ki trei beit ïa ka kam ban pynkhuid bad kit ïa kitei ki jaboh ba ladep lum thup shi jaka khnang ban wanrah ïa ka khuid ka suba bad ka koit ka khiah jong ki paidbah nong shong bad wan ïew.