Shim bynta 132 ngut ki nongmareh ha ka Marathon : Plie pyrda ka Dr. K.L. Iawbor ïa ka Mawlai Games & Literary Fest 2026

SHILLONG, Kyllalyngkot 04: Ka Joint Director ka DHS kaba dei ruh ka Project Director ka Meghalaya Aids Control Society (MACS) i Dr. K.L. Iawbor ha ka 03 tarik u Kyllalyngkot 2026 i la plie ïa ka Mawlai Games & Literary Fest 2026 ha ka jingïadonlang u Bah Hering Shangpliang-AFC Professional Coach kum u Symbud Kongsan, ki Rangbah Shnong jong ka Shnong Mawlai, ki nongïalam Seng Samla, ki dkhot jong ka Organising Committee ka MG&LF lem bad kiwei kiwei.
Haba ai jingkren kum ka kongsan ka Dr. Iawbor ka la ai khublei ïa ka Organising Committee jong ka MG&LF kiba la shimkhia ban pynlong ïa kane ka lympung jingïalehkai kaba long ruh ka lympung kaba ïarap ïa ki samla ban lait na shibun ki jingsniew khamtam eh u drok.
Ha kawei pat ka liang u Bah Hering Shangpliang u la kyntu ïa ki samla ba ki dei ban shim bynta ha ki jingïalehkai da ka mynsiem jong ka jingïaieid da kaba ban jur ba ka kam ïalehkai ka dei ka atiar kaba pynbha ïa ka longrynïeng ka jong ki hi.
Ha kane ka sngi la pyn iphuh shuh shuh ïa ka jingïalang plie pyrda lane ka Opening Ceremony da ki jingrwai kiba sngewtynnad bha ba la rwai da ka Mawlai Choir ïa ka theme song jong ka Mawlai Games bad ka jingrwai kyrpang na u Samla Freddie Nelson Thangkhiew.
Kum ka dak ka jingplie ïa kane ka Mawlai Games & Literary Fest 2026, ka kongsan ka la pynkiew ruh ïa ka lama. Hadien ka Opening Ceremony ka lah don sa ka jingïalehkai phutbol jong ka 1st Round ha kaba ka Mawdatbaki ka la jop ïa ka Mawtawar da 4-1 kol.
Lah ban kdew ruh ba ha kajuh ka sngi, kata ha ka por mynstep, u Bah Binningstar Lyngkhoi uba dei uwei na ki khlur ïakop mareh marathon ba paw jong ka Jylla bad uba dei ruh uwei na ki dkhot jong ka MG&LF lem bad u Bah Goldenstar Kharbuli Chairman ka MG&LF ki la kaweh lama ïa ka Marathon ha kaba ki la don haduh 132 ngut ki nongmareh na ka shnong Mawlai kiba la ïashim bynta.
ïa ka jingmareh marathon la phiah ha ki ar bynta bad kata ka long Junior boys & girls kiba hap ha ka thup Under 16 bad ka jingjngai jong ka jingmareh na ka bynta kane ka kyrdan ka long 4 km bad kawei pat ka thup ka dei ka Senior Category jong ki kynthei bad shynrang bad ka jingjngai jong kane ka jingmareh kan long 8 Km.