Shad kmen ki nongshong shnong ka Jowai kum ka dak ban pdiang sngewbha ïa u snem thymmai

Jowai, K’Lyngkot 02 : Ki Dorbar Shnong bad ki Dong hapoh ka sor Jowai hynnin ka sngi 1 tarik u Kyllalyngkot, kum ka dak ban pdiang sngewbha ïa u snem thymmai-2026 kila ïamih paidbah nala ki jong ki dong ban pynlong ïa ka jingshad kmen bala shim bynta shongshit naduh ki longkpa, ki longkmie, ki khun samla bad ki hep kiba rit.
Kumba ju long manla u snem haka shi tarik ka sngi ba nyngkong u snem thymmai baroh ki Dorbar Shnong bad ki Dong hapoh ka sor Jowai kila pynlong ïa kane ka jingïashad sngewbha, hadien ka jingïabam khana bad wan ïuhkjat tiap ha Ïawmusiang ban pynpaw ïa ka jingsngewkmen ban pdiang sngewbha ïa u snem thymmai.
Ïa kane ka prokram ha Iawmusiang la pynlong da ka Synjuk ki Waheh Shnong Jowai ha ryngkat ka jingïatreilang bad ka District Tourism Promotion Society West Jaiñtia Hills, kaba la tip kum ka ‘Community New Year Celebration, 2026’
Baroh ki Dorbar Shnong kiba la wan ban ïashim bynta ha Iawmusiang ki don haduh 15 tylli ba kynthup ïa ka Khimusniang, Chutwakhu, Ladthadlaboh, Tympang Iawmusiang, Lion Mission Compound, Mynthong, Tpep-pale, Dongmihsngi, Salaroh, Loomsooiung New Hill, Moosalyngkat, Mookyrdup, Lumpariat, Panaliar, Caroline Colony bad ka Tyndowapung. Katba ki 3 tylli ki Dong ki kynthup ïaka Khliehïongriang, Khliehmyngkrem bad Myntdu Pynthornein. Haka juh ka por la sam ruh ïa ki syrnot (Certificate) sha manla ki dong kiba la poi ha Iawmusiang.
Na ka liang ka Synjuk ki Waheh Shnong Jowai kala ai ka jingkitbok kitrwiang sha baroh kitei ki dong lyngba jong une u snem thymmai 2026 un wanrah ïa jingbha jingmiat, ka jingïatylli bad ka roi ka par ha baroh ki liang jong ka sor Jowai.