Ka sorkar kan ym pyndem ha ki jingpyntieng kohtympan ki kynhun kaikhlaw, ka kloi ban ïakren bad ka HNLC : Dy CM

Shillong, Nohprah 21 : U Symbud Myntri Rangbah u Ma Sniawbhalang Dhar ula pynthikna ba ka Sorkar kan ym pyndem da lei lei ruh ha ka jingpyntieng kohthympan jong kino kino ki kynhun kaikhlaw da ki kam pyntriem jongki, hynrei ha kajuh pat ka por kan ym sngap jar ne ailad ruh ïa ki jingbyrngem na ka HNLC tangba ka kloi ban ïakren namar lehse kam longkam ha ka wat ba nyngkong hynrei da ka jingïai ïa kynduh bad ïai ïakren yn sa poi hi sha ka thong ban ïa sngewthuh jingmut lang.
U Ma Sniawbha ula pynrem jur ruh ïa ka jingpynbthei bomb improvised explosive device (IED) ha phyllaw ka Dhar Construction Company ha Shymplong, East Jaintia Hills.
“Ngi na ka Sorkar ngin ym shu sngap jar ïa kum kine ki jingbyrngem. Ngi pyrshah jur ïa kine, khamtam haba tip ba ka HNLC ka dei ka seng bala shah ñiew beaiñ. Donbok, ki Pulit kila shimkhia mardor bad kem ïa katto katne ki briew, bad ngi ngeit ba ki Pulit kin leh ïa ki kam kat kum ka aiñ” ong u Symbud Myntri Rangbah.
Ula kynthoh jur ruh ïa ki jingkren khieh khlieh tdong tdong jong ka HNLC haba ïadei bad ka jingdawa pisa haba ong “Phi la ïohi ba kila kren khlieh khlieh tdong tdong da ma ki hi. Katto katne bnai mynshuwa kila kam ba u Ma Sniawbhalang Dhar ula siew ïa ka jingdawa bad mynta kila ong ba u khlem siew sha ki. Kumta, kine ki jingkynnoh baroh ki dei ki bym shong nongrim bad bym ïahap”.
U Symbud Myntri Rangbah ula ban jur ïa ka jingkut jingmut ka Sorkar ban ïakhun pyrshah ïa ki kam pyntriem ki riewkiengatiar bad ki nongpynthut ïa ka suk ka saiñ haba kyntu ïa ki paidbah ba kim dei satia ban sheptieng.
“Nga kwah ban phah ïa ka khubor kaba shai sha ki paidbah ka Jylla, kynthup ki samla, ba ngin ym pyndem ha kino kino ki kynhun kaikhlaw. Ngi long pyrshah ïa ki kynhun ba pynthut ïa ka suk ka saiñ ka imlang sahlang. Ngi kyntu ruh ïa ki paidbah ka Jylla ba kim dei ban sheptieng naba ka Sorkar ka ïadon ryngkat bad ki” ong u Ma Sniawbha.
Haba ïai pynpaw ïa ka jinglong ba kloi ka Sorkar ban ïakren ïasuk, u Ma Sniawbha u phah ïa ka jing khot sngewbha ïa ka HNLC ba kan wan sha ka jingïakren ïasuk.
“Ka jingkhang ka plie na ka bynta ka jingkren ïasuk bad ka HNLC. Ha ka jingshisha, kila wan sha ka jingkren ïasuk ha ka kyrdan u Myntri kam Pohïing bad haduh mynta ka jingkhang ka dang ïai plie. Ngi kwah ïa ka jingsuk kaba neh slem ha Jylla bad ban pynthikna ïa ka suk ka saiñ ka don ha Jylla” ula ong.
U la pynkut da kaba khot sha ka jingïatylli bad ïalong kawei na ka bynta ka roi ka par jongka jylla bad khamtam ban ai ka jingsynshar na ka bynta ka bha ka miat jong ki paid nongshong shnong.
“ Ngi kwah ban pynkhlaiñ ïa ka jylla namar ngi kwah ban roi ban par bad kiew shaphrang ha baroh ki liang kumta ngi long pyrshah ïa kino kino ki jingpyrshang ban pynthut pynsmiej ïa ka imlang ka sahlang.