Shwa 2030-34 ki nonghikai dei ban dep ïa ka ITEP ba saw snem : Education Minister

Shillong, Nohprah 19 : Ka District Institute of Education and Training (DIET), Sohra ha ka sngi Thohdieng ka la rakhe ïa ka jingdap 25 snem ka jingshakri jong ka na ka bynta ban pynjanai bad pyntbit shuh shuh ïa ki nonghikai kiba hikai ïa ki khynnah rit ha ki skul bapher bapher kiba don ha ka jylla.
Ha kane ka jingrakhe la donlang ruh u Myntri ka tnad Pule Puthi ka sorkar jylla, Bah Lahkmen Rymbui kum u Kongsan ryngkat ka jingdonlang u MLA ka Sohra, Bah Gavin Mylliem, MLA ka Shella Bah Balajied Synrem, Bah R. Rapthap, IAS, Commissioner & Secretary ka tnad, Bah MA Challam, MCS i/c Sohra Civil Sub- Division, Bah PB Lartang, Jt. Director DERT; ki Principal jong baroh ki DIET ba don ha Meghalaya, ki nongtrei, ki nonghikai ba la shah hikai ha katei ka jaka bad kumjuh kiba dang don ha ka jingshah hikai.
Haba kren ha ka jingïalang, u Myntri u la ïathuh ba naduh u snem 2012 ka sorkr jylla ka la pynshlur ïa ki samla ka jylla ba kin jied ïa ka kam hikai kum ka kam da kaba kyrshan ïa ka jingpynkhreh jong ki lyngba ki stipend bad kiwei kiwei ki jingkyrshan.
Shuh shuh u ong ruh ba ka pule puthi ha ka jylla ka la kylla dur bun bha ha kine ki hynniew snem shiteng. U la kdew ruh ba katkum ka hukum jong ka Supreme Court, ka Teacher Eligibility Test (TET) ka dei kaba dei ban don da baroh, wat na ka bynta ki nonghikai kiba la trei 25–30 snem ha ka kam ruh namar kane ka donkam ïa ki nonghikai ba kin ïai bteng ban pyntbit ïalade na ka por sha ka por.
U Myntri u la kdew ruh ïa ka bynta kaba kongsan bha ba ka DIET Sohra ka noh synniang na ka bynta ban pyntbit ïa ki nonghikai khamtam eh katkum ba la kdew ha ka National Education Policy (NEP), kaba ong ba ha shwa u 2030 – 34 baroh ki nonghikai ki hap ban pyndep ïa ka jingshah hikai pyntbit kaba saw snem kaba tip kum ka Integrated Teacher Education Programme (ITEP).
U ong ruh ba ka DIET ka la long kum kawei na ki jaka ai jinghikai kaba la ïaid ryngkat ryngkat bad kiwei pat ki jaka ai jinghikai ha ka Ri.
Ha kane ka sngi la ïoh ruh ïa ka jingkren na u Bah Balajied Synrem kumjuh na u Bah Gavin Mylliem kiba la ai ka jingïaroh ïa ka jingshakri jong ka DIET Sohra ha kine ki 25 snem.
Shwa kan, ka Principal jong ka DIET Sohra, Kong A.M Sohliya ka la ai ïa ka history lyngkot kumno ki sdang ïa kane ka jaka ai jinghikai naduh u snem 2000.
Kum shi bynta jong ka jingrakhe, la pyllait ruh ïa ka thup sahkynmaw ne ka Souvenir bud pat sa ka jingpynkup burom ïa ki nonghikai kiba la ai ka jingshakri ha kine ki 25 snem ba la dep.