Mynjur ka sorkar ban wanrah ka jingsiew tulop ba ryntih ïa ki nonghikai Adhoc bad SSA ha Meghalaya

Shillong, Nohprah 19: U Myntri Rangbah ka jylla u Conrad K Sangma u la pynbna ïa ka rai ba kongsan da ka kynhun myntri sorkar ban wanrah ïa ka jingsiew tulop kaba ryntih, ka jingpynkiew ba man la u snem bad ka jingshngain ha kaba iadei bad ka jong ki 23,000 ngut ki nonghikai Adhoc bad SSA ha Meghalaya.
“Mynta ka sngi ka kynhun myntri sorkar kala shim ïa ka rai ba kongsan bha bad ka jingkylla ba khraw ha kaba iadei bad ka liang jong ka tnad pule puthi” la ong u Sangma haba pynïaid ïa ka jingïalang ba khatduh jong ka kynhun myntri mynta u snem ka sngi Thohdieng.
“Ngi la mynjur ïa ka jingtyrwa ban thaw ïa ka jingsiew ba ryntih na ka bynta ki nonghikai adhoc bad SSA, ryngkat bad ka jingpynkiew tulop ba man la u snem bad ka jingpynkiew tulop kan long katkum ka jinglong rangbah.”
U la bynrap ruh ba la pynthikna ïa ka kam na ka bynta kine ki nonghikai, ha kaba la don ki kyndon ban noh synñiang sha ka Contributory Provident Fund (CPF) da baroh ar katta ki nonghikai bad ka sorkar.
“Ïa kane yn pyntrei kam naduh ka shi tarik u bnai ïaiong jong u snem 2026,kumba la kular,” ong u Sangma, da kaba kdew ruh “kum ka khubor na ka bynta ki nonghikai.”
“Nga la pyndep ïa ka jingkular ba nga la ai sha ki nonghikai jong ngi bad ha ki lai bnai ban wan hadien u snem thymmai ngin sa trei ia ka rukom ba ngin sa pyntreikam, ki rukom pyniaid bapher bapher kiba donkam bad lyngba kata ka por ngan sa pyntip ïa phi shaphang ki nombar ba bniah hynrei ia kine ki nombar la dep ban iakren bad ki nonghikai SSA bad adhoc bad lyngba ka jingiakren bad ki mynta ba ngi la wanrah ia kane ha ka kynhun myntri bad ka kynhun myntri ka la mynjur ia ka,” u la bynrap.
Kane ka rai kan kynthup ïa kumba 23 hajar ngut ki nonghikai adhoc bad SSA. Halor ka jingktah ha ka liang ka pisa tyngka, u Sangma u la ong ba ka jingktah ka long kaba “heh bha” hynrei um shym la pynpaw ia ki jingkhein.
“Kane ka dei ka jingkylla kaba khraw bad ka rai kaba leit ban pynkylla ia ka tnad pule puthi,” u la ong, da kaba ai khublei ia ki nonghikai, u myntri pule puthi, bad ki heh sorkar na ka bynta ka jingpyrshang ka jong ki.
Haba kylli, u Sangma u la ong, “(Kane ka long) ha kawei ka rukom bad ka dei ka khubor Khristmas kaba bha na ka bynta ki nonghikai jong ngi namar kane ka dei kaei kaei kaba ki nonghikai jong ngi ki la dawa la slem bha. Naduh ka por ba nga la shimti kum u myntri rangbah, wat shwa kata ruh la bun snem bad ki phew snem kane ka la long ka jingdawa kaba la slem bha jong ki nonghikai SSA bad adhoc bad nga dap da ka jingkmen ba ka sorkar MDA jong ngi kala shim ka rai ban rah ia kane shakhmat bad wad ia ka lad ki lynti na ka bynta baroh ia kane ka jingeh kaba la iakren bniah ha ki jingialang kiba bun bad ki nonghikai.”
“Nga ai khublei ïa ki nonghikai na ka bynta ka jingïatreilang jong ki bad na ka bynta ka jingshaniah jong ki bad nga ai khublei ïa u myntri ka pule puthi, u commissioner & secretary bad baroh ki heh jong ka tnad pule puthi, kiba la trei shitom ban poi sha kane ka kyrdan kumba nga la ong ba kane kan long ka jingkylla ba khraw bad ka rai kaba kongsan kaba leit ban pynkylla ïa ka tnad pule puthi ha ki sngi ban wan,” u la bynrap.