Jowai, Naitung 07: Ka Dorbar Shnong Ialong lyngba u Waheh Shnong jong ka u ma T.Ram Phawa ka kwah ban pynshai paidbah ha kaba ïadei bad ka jingshah kem ki ar ngut ki nongkhaïi Drug mynta ka sngi 7 tarik ha ki pulit ka East Jaiñtia Hills District haka shnong Umtyra, ha kaba uwei na kine u Heirtami Dkhar ula kam ïalade ba u dei na ka shnong Ialong.
Halor kane ka shnong kala pyntip ba kam shem la ithuh ba udei u khun jong ka shnong bad kala pynrem jur ïa kane ka jingkam uba la nud ruh ban pynthoh bria ïa ka shnong ka thaw.
Shuh shuh la ïathuh hapoh ka Dorbar Shnong Ialong ym don satia ki jait kur Dkhar hapoh ka shnong bad lada dei uba wan shongkha ruh ka shnong kam lah ban pdiang namar um don ka kyrteng hapoh ka Register ka shnong.
La ong ruh lada une u Heirtami Dkhar u kam ba u dei u nongwan shongwai hapoh ka shnong ïa kane ruh ym lah ban pdiang namar ïa ka kyrteng jong u ha ka Tenancy Act,2021 jong ka Dorbar Shnong Ialong ruh ym shem la don ha ka thup Recognized Certificate ka Shnong.
Ha ka juh ka por ka shnong ka kwah ruh ban pynshai halor ka jingshah kem ki lai ngut ki nongkhaïi drug ha ka 5 tarik u Naitung ha ki pulit ka West Jaiñtia hajan ka Ialong Park bad ki pulit kila ïoh kurup na ki ïa u Drug, ka pisa, ka pistol, ki kuli, ka waitlam ryngkat ki ar tylli ki kali.
Ka Dorbar Shnong Ialong ka kwah ruh ban pyntip ba kitei ki nongkhaïi Drug kila thmu ban phet rieh na u surok NH-5 na ka liang Phramer da kaba leit rung beit beit sha katei ka jaka hajan ka Ialong Park ban lait na ki pulit.
Wat na ka liang ka Dorbar Shnong Ialong kala pyntip haduh kine ki sngi ka dang bteng ka jingïatreilang bad ki bor jong ka aiñ, ban khang lad ïa ka jingthmu pynrung ïa u Drug shapoh ka shnong ka thaw, pynkut ka kyrwoh na u Waheh Shnong Ialong.
