Haba la ïoh jinghikai long borabor kiba thmu ban pynïaid shakhmat ïa ki kam: G. Lyngdoh

Mawkyrwat, Nohprah 18 : Ka Jespar Institute of Professional Skill Society, Mawkyrwat mynta ka sngi ka 17 tarik u Nohprah, 2025 ka la ïoh ban pyndep ban sam ïa ki Syrnod ne Certificate sha baroh ki 25 ngut kiba la pyndep ïa ka jingshah hikai ha kaba ïa dei bad ka jingshna Ice Cream ba la long hapoh ka Jespar Institute of Professional Skill Society, Mawkyrwat Centre ha Mawkyrwat, South West Khasi Hills District.
Lah ban kdew ba 25 ngut ki nongwan leit shah pyntbit ne shah hikai ban shna Ice Cream hapoh ka Jespar Institute of Professional Skill Society, Mawkyrwat ki la lah ban pyndep ïa ka thong jong ki hapoh ka por ba la buh kata 15 sngi.
Ïa kane ka program la pynlong hapoh ka jingpeit jong ka ophis jong u District Commerce & Industries Centre ne DCIC, South West Khasi Hills District kaba hapoh ka Raising and Accelerating MSME Performance (RAMP) Scheme ba la bei tyngka na ka World Bank.
U bah G. Lyngdoh, Assistant General Manager jong ka District Commerce & Industries Centre (DCIC), South West Khasi Hills District haba kren kum u kongsan u la pynpaw ka jingaikhublei na ka bynta baroh ki 25 ngut kiba la pyndep ïa ka jingshah hikai ban shna Ice Cream bad da kane ka jingpyndep jong ki kan long kawei na ki lad ba nangne shakhmat kin sa ïoh ban pyndonkam hok ïa ki bynta ba ki la ïoh jinghikai.
“Haba ki la ïoh ïa ki Syrnod, wat ai ba kin long tang ka kot ban shu buh hapoh ka File hynrei dei ban pyndonkam hok ïa ka na ka bynta ka myntoi ïa ka lawei jong ki ha ka ban sa wan”, ong u bah G. Lyngdoh bad ym tangkata haba ki la ïoh ki jinghikai ki dei ruh ban long borabor kiba thmu ban pynïaid shakhmat ïa ki kam. Shuh shuh ula ai mynsiem ïa ki, ba ki dei ban pyndonkam hok ïa ki lad jingïarap na ka sorkar kiba bun khnang ba ka jingthmu jong ki ban ïeng ha la ki jong ki kjat kan lah ban kyrshan ïa ki bad ba kin lah ban pyntyllun ïa ki kam kham shakhmat.
Kumta ïa kane ka program ban sam ïa ki syrnod la pynlong hapoh ka Jespar Institute of Professional Skill Society, Mawkyrwat Hall kaba hapoh ka jingpynïaid jong ka kong Eearlynnancy Lyngdoh Mawphlang kum ka Nonghikai ha ryngkat ka jingdonlang ruh u bah Edwinson Nongbri, Block Project Manager jong ka SVEP, Mawkyrwat C&RD Block kum u Symbud Kongsan.
Kiwei de kiba la ïa donlang ki long ka kong Danosha Nongrum kaba la ai ka jingdwai sdang, u bah Jesparwell Lyngdoh, Founder jong ka Jespar Institute of Professional Skill Society, Mawkyrwat uba la kren ai khublei lem bad kiwei de kiba kynthup ïa kiba wan shim ïa ki syrnod.