Nongstoiñ, Naitung, 7: Khambun na ki paitbah nongshong shnong ka thaiñ Myrïaw ki dei kiba im da ka rep ka riang bad ki mar rep kiba kongsan jong ki, ki dei u sohsaw, sohmynken jhur, riewhadem, ki jhur ki jhep, ki soh, sohphlang, biskot bad kiwei kiwei ki mar rep.
Ha kine ki sngi ka la dei ka aïom ba u sohsaw u la sdang ban ih bad ki nongrep ki la ïabeh sha ki lyngkha jong ki ban kheit bad ban pynïaid ïew ha kylleng ki jaka hapoh ka jylla bad wat shabar ka jylla ruh. Ha kaba ïadei bad ka jingpynïaid ïew ïa u sohsaw, u bah Grossful Parïong sordar barim ka shnong Mawkamoit, u la ïathuh ba ha kine ki sngi ba ka aïom kheit sohsaw ka dang sdang, ki nongrep ki lah ban pynmih kumba ar haduh lai Mahindra pickup man la ka sngi bad ka dor ka poi laiphew haduh laiphewsan tyngka shi kilo kata naduh shnong Mawkamoit.
Nalor kata u la ong ba ka jingïoh kheit sohsaw ha une u snem ka suki bha, namar ka jingkylla kynsan jong ka mariang ha ka por ba dang sdang thung ïa u sohsaw lada ïanujor bad ki snem ba la dep. U bah Parïong u la ong ruh ba mynta u snem u sohmynken jhur ruh um da thikna, namar hadien ba ki la dep sara ïa u symbai pynban ka jingjur slap palat bun ki symbai kiba dang sdang mih ki ïap ïong bad ki nongrep ki hap ban sara biang da kiwei pat ju symbai kiba thymmai. Hynrei wat la ka aïom ban thung ka la kham dier khyndiat ruh kumba long mynta kam pat da ktah eh ïa ka jingheh jingsan jong u jingthung.
U la ong ba haba phai ha ka jinglong jingman jong ki nongrep biskot pat, mynta u snem ka jingpynmih biskot na katei ka thaiñ ka duna bha, namar ka jingsoh ka duna bha bad u jyntang ruh um da san bha kumba long ha kiwei pat ki snem ba la dep.
