Nongstoiñ, Nohprah 17: Ka shnong Riangpoit ka shnong kaba la don naduh hyndai kulong bad ka dei ka shnong kaba don ïa ki nongshong shnong kiba don akor bha bad kiba pariah parai ïa ki lok ki jor. Katei ka shnong ka dei ruh kaba seisoh haduh katta katta bad ki briew ki dei kiba trei shitom ha ka rep ka riang , thung dieng soh bad rep bun jait ki mar rep, thaiñ jingthaiñ kum kip rah, ki shang, ki khoh ki star bad kiwei kiwei.
Ha ka jingleit jngoh jong u nongthoh khubor ïa ka jinglong jingman jong katei ka shnong, la ïoh ban ïakynduh bad u bah Dominik Umsong uwei na ki rangbah kiba ieit haduh katta katta ïa ka tynrai, ka riti ka dustur ba la buh da ki long shuwa uba buh jingkynmaw ruh thik pa thik ïa ki khana pateng ba la ïathuh da u kpa rad jong u. Nalorkata u dei ruh u briew u ba ieit bha ïa ki jingri jingdup khamtam eh ïa ki masi.
Haba ïakren bad u nongthoh khubor u la ong ba naduh dang rit u don ïa ka sap ba kyrpang ban shna ïa ki tiar ki tar ba ki nongshong shnong ha kylleng ki jaka ki ju pyndon kam kham tam ki nongrep. Ha kajuh ka por u la ong ba namar ba u ieit bha ïa ki masi haduh kine ki sngi u don shi khuti ki masi bad lada kheiñ lang baroh bad masi khun bad masi kmie ki don palat shispah sanphew tylli.
U la ong ruh ba haduh kine ki sngi, ha ka por mynsngi u sharai masi bad na lum ap masi u pom ïa ki siej kiba la ïaw kiba long ban shna jingshna kum ki sping wait, ki tangmuri, ki tang besli, ki tanglot, ki maryngod, ki marynthing bad kiwei kiwei. U la ong ruh ba haba u don ha ïing um ju pynsep ei ïa ka por hynrei u shna ki ksing, ki nakra, ki duitara, ki sitar bad bun jait ki tiar tem tynrai ba ki longshuwa ki ju pyndonkam.
Utei u rangbah haduh mynta u dang tyngkai bad ri kyndong ïa ki tiar ki tar ba ki riew hyndai ki ju pyndonkam ha kaba ïaleh thma kum ka stieh, ka waitlam bad u sum. U la ong ba ha kine ki sngi ba ka aïom rang ka la sdang haba u shongkai ha lum katba ki masi ki dang muja ban bam phlang, u ju pynlut por ban tem sur da ka tyndong siej kaba u la shna kyrpang ban pyn sngewtynnad.
Utei u rangbah u pynlut por ruh ha ka rep ka riang khamtam eh ha kaba thung diengsoh. U la ong ruh ba da ki spah tynrai ki dieng soh ñiamtra kiba u la thung naduh mynshuwa ki la don bad haduh mynta la jan dap hajar ki dieng sohñiamtra kiba u la thung.
Ha kajuh ka por u long u nongri ngap u ba tbit bha bad sawdong ka kper jong u ki dap da ki ksing ngap bad sawdong ka ïing jong u ki don ki ksing ba u ri ïa ki jait ngap kiba rit bha ba ki ju khot u ngap dkai bad ka umngap dkai ka dei ka umngap kaba rem dor tam bad ka dor ka poi haduh ar hajar tyngka shi bilor.
Khatduh eh u la ong ba kaba lyngoh ba ki briew ha kine ki sngi ki ud ki nam ba kim don kam don jam, hynrei katei ka jing ong jong ki ka dei tang ka jingkren lait jynhaw. Namar kim kwah ban pynshitom ïa ka bor met jong ki bad kim pyndonkam ïa ka sap kaba u nongthaw u la ai. Hynrei lada ki trei shitom ban pyndonkam hok ïa ka khyndew kaba u Blei u la ai sngewbha ba u briew un trei un ktah un rep un riang kan ym don satia ka jingkyrduh kam.
