Nongstoiñ, Naitung 7: Ka long kaba isangsot ban ïohi ïa uwei u heprit, ba ka jingpang kaba khyllah ka la wan ban lyngshop kynsan ïa u mynta la kumba 1 snem ei ei, ha kaba la ïohi ba ka met jong utei u heprit ka la shu at baroh kawei, lait noh tang ki kti pat kiba la ring sdot kat haduh ba utei u heprit u la hap ban shu thiah beit tang hajuh.
La ong ba ka jingshitom jong utei u heprit ha kaba sdang nyngkong eh ka dei tang ka jingpang shit, hynrei hadien katto katne sngi ka jingpang ka la kylla pynban kumtei ha kaba naduh ki kjat, ka jinglong shynrang ka la at lut bad ka kpoh lei lei kat haduh ba la I satang ban bthei.
Utei u heprit u dei u khun ksiew jong I kong Ediltredis Nongsiej bad u bah Krik Musulman kiba shong ka sah ha ka shnong Sohpian Nongstoiñ. La ong ba ki dei ruh ki longïing kiba duna ha ka ïoh ka kot, namar ki long tang ki nongshong basa shipor ha ka ïing jong u kynrad, ban long kum ki nongap pahara ïa ka pung dohkha bad ki sah rung tang saw ngut kynthup ïa ka kmie jong u ka bym da biang ha ka pyrkhat pyrdaiñ.
Ïa katei ka longïing mynta ka sngi ka seng FKJGP hapoh ka jingïalam jong u samla Pynshai Kharbani President Nongstoiñ pyllun, ka la leit ban ai mynsiem da kaba synñiang lem khyndiat khynsoit ki jingdonkam kum shibynta ban pynpaw ïa ka jingïatiplem ha ka imlang sahlang. Ha katei ka sngi la ïadonlang ruh u Nicky Marweiñ Secretary FKJGP Nongstoiñ pyllun, Vincent Marngar President ka FKJGP tnad Sohpian bad kiwei kiwei.
