Ka NHAI kan sa maramot noh ïa ki bynta ba la jot ha shilynter ka NH 44 (E): F.Umdor

Nongstoiñ, Naitung, 7: Ka jingdon jong ka Nationnal Highway 44 (E) na Shillong sha Tura ka la pynsuk shibun ïa ki paitbah ha ka leit ka wan bad ka kit ka bah bad ka la pynsuk shibun ïa ki nongñiah kali. Wat la katta ruh ha shilynter katei ka surok bah, ki la don bun ki bynta kiba ka surok ka la orpait bad ka la sdang ban ngam, namar ka jingkyrsoi um napoh khyndew ha ki por lyiur.
Ha kaba ïadei bad kitei ki bynta ba la orpait bad kiba la sdang ngam, u bah Fabian Umdor Executive Engineer u ba dei peit ïa ki surok National Highway ha Meghalaya, u la ba ka ophis ka la pynkhreh shait shait ïa ki jingthoh jingtar na ka bynta ban phah sha ka Head ophis jong ka National Highway Authority of India bad mynta ka la dep phah na ka bynta ba kan leh ïa kaba donkam.
U la ong ruh ba ka jingpynkhreh ïa ka mang pisa na ka bynta ban maramot ïa kitei ki bynta ka la ïaid shait shait bad ynda ka NHAI ka la dep ban mang pisa, kan sa phah maramot noh kloi katba lah bad ban pyndep ha ka por kaba biang. U bah Umdor u la ong ruh ba ïa baroh ki surok National Highway, ka NHAI kam ju aiti satia ha ki sorkar jylla hynrei ka hap ban peit ban khmih hi nadong shadong.
Ha kaba ïadei bad ka jingud jingnam jong ki nongñiah kali na ka daw jong ka jingkynjang palat jong u speed braker ha Jeidohkroh, ha ka jaka ba ju jia khah ka jingaksident kali, u bah Umdor u la ong ba lada ym shna ïa utei u speed breaker ruh ka jing aksiden kali ka jia man la ka por. Kumta ym banse ban shna bad kumba ka long mynta ka jingaksiden ha katei ka jaka kam da kham jia shuh naduh ba la shna ïa utei u speed breaker.
Ha kajuh ka por u la ong ba mynta ka ophis jong ka National Highway, ka dang pynkhreh shait shait ban shna noh ïa ka surok na kawei pat ka liang, na ka bynta ban pynsuk ïa ki nongñiah kali bad ka jingpynkhreh ïa ki kot ki sla ban phah sha ka Head ophis ka la ïaid shait shait.