Ba duh tulop 9 bnai khang tala ki MDC ka VPP ïaka khyrdop ka JHADC

Jowai, Nohprah 17: Ki MDC ka Voice of the People Party (VPP) na Jaiñtia Hills mynta ka sngi 17 tarik u Nohprah naduh ka por 9 shiteng kila leit ban khang tala syndon ïa ka khyrdop jong ka Jaiñtia Hills Autonomous District Council (JHADC) Jowai namar ka jingduh tulop ba 9 bnai jong ki nongtrei ka JHADC.
Ki dkhot ka VPP kynthup ïa ki 8 ngut ki MDC bad ki nongkitkam jong ka napoh ka Jaiñtia Hills kila pyneh triang da kaba ïeng beit hakhmat jong ka khyrdop ka JHADC bad dawa pynïoh jingpynshai lyngba ka jingthoh halor ka jingduh tulop ki nongtrei bad lano ka sorkar kan siew noh ïa kane ka tulop ba dang sah.
Kata ki dang pynlong ka jingïakhih la wan poi u ma Moonlight Pariat bad nangta sa u Deputy CEM ka JHADC kiba thum ban rung beit shapoh phyllaw ka JHADC da ka kali jong ki, hynrei ki MDC ka VPP bad ki nongkyrshan kila pyneh triang bad ym ailad satia ïa ki kali jong ki ban rung na ka khyrdop (gate) bad hadien ka jingïatai nia mar kylliang kila leit rung noh daka kjat sha ophis ka JHADC.
Ki la pynsngew ruh kane ka jingduh tulop ki nongtrei la 9 bnai bad ki MDC 5 bnai kala buh jingeh ïa ki ban thied ïa ki jingdonkam ha ki ïing ki sem, ki jingdawa ban siew ïaki khun ki kti, bad bun na ki nongtrei kila hap ban shim da ka ram ban pyndap ïa kitei ki jingdonkam.
Hynrei tad haduh ka por duna 3 baje nohphai sngi kila weng noh ïa ka jingïakhih, hadien bala ïoh ka jingkular naka sorkar lyngba ka JHADC ban siew noh shibnai ïa ka tulop jong ki nongtrei ka Council kaba kot 8 klur tam.