Phah tuklar u MP ïa u Myntri Environment ban ïada ïa ka Experimental Botanical Garden ha Barapani

Shillong, Nohprah 16: U MP ka Shillong Parliamentary Constituency u Dr Ricky AJ Syngkon u la kyrpad ïa u Myntri ka sorkar pdeng uba khmih ïa ka Environment u Bhupender Yadav ban tuklar bad ïada ïa ka Experimental Botanical Garden ha Barapani, Shillong, na ka jingkyntur jaka na ka bynta ka jingai dak ban shna ïa ka Greenfield NH-6.
Ha ka shithi ba la phah ha ka sngi baar, u Dr Syngkon u la pynpaw ïa ka jinglong kongsan kane ka kper, da kaba ong, “Kane ka kper la ithuh ïar kum kawei na ki jaka ba riewspah ban pynneh pynsah ïa ki jingthung, kiba don kumba 1,200 tylli ki jait jingthung, kynthup ïa ki jingdon kiba bun jait, kiba la don jingma na ka Indo-Burma Biodiversity Hotspot.”
U la banjur ba ka jingpynneh pynsah ïa ki jingdon kiba kordor ha kane ka kper kan long ka jingmyntoi na ka bynta ki highway project, da kaba ong, “Ka jingduh ne ka jingjulor noh ïa kane ka atiar kaba kyrpang kan ktah ïa ka bynta jong ka surokbah lyngba kane ka thaiñ.”
U Syngkon u la kyrpad ïa ka ministry ban bishar ïa kane ka jingtyrwa da ka jingïasyllok bad ki riew shemphang bad ka jingdonkam ban ïada ïa kane ka jaka.
“Nga la kyrpad ruh ïa ka ministry ban ai buit ïa ka Ministry of Road, Transport & Highways bad ki project khamtam ki shnat kiba pyntreikam kum ka NHIDCL ba kan shim da kiwei ki jingai dak na ka bynta ka Greenfield NH-6 corridor kaba ïaid lyngba kane ka kper da kaba pynthikna ïa ka jinglong kyntang bad ka jaka kaba lah ban leh shibun ki kam wad bniah ha ka pule puthi.”
“Ka Experimental Botanical Garden ha Barapani ka dei ka kam jong ka jingsarong ym tang ïa ka Meghalaya hynrei na ka bynta baroh kawei ka ri,” pynpaw u Dr. Syngkon da kaba kyntu ïa u Myntri ban shim ïa ki kam kiba kongsan halor kane ka bynta.