Shillong, Nohprah 16: Ka kynhun ïalehkai kriket jong ka jylla Meghalaya ka la don hapdeng ka jingeh ha ka sngi ba nyngkong jong ka jingïalehkai plate group ha ka lympung U-19 men’s Cooch Behar Trophy 2025-26 pyrshah ïa ka Mizoram shuwa ba kan lah ban wanphai da kaba kamai 219 ron haduh ban da khyllem baroh ki nongtied (all out) ha ka pali tied kaba nyngkong (1st Inning) ha Anand, Gujarat hynne ka sngi Ba-ar, 16 tarik Nohprah.
Haba wan ban tied, ka Mizoram ka la lah ba kan kamai 129 ron bad khyllem 5 wiket, bad ka dang bud dien sa 90 ron ban jop.
Ka Meghalaya kaba la jop ïa ka jingkynting pisa (toss) bad shimti hi ban tied nyngkong ka la mad ïa ka jingeh kaba khraw ha ka por ba ka la duh 7 wiket tang na ka bynta 132 ron shuwa ba u Rudra Singh Rathor (55 ron naki 88 bol, 11x4s) bad ki nongïalehkai kiba bud nadien ki la lah ban kyrshan ïa ka kynhun ban kynjoh palat ïa ka 200 ron ha ka jingïalehkai ba ka kynhun ka donkam ban khur ïa ka jingjop.
U Mannan Surana u la noh synñiang da kaba kamai 31 ron (51 balls, 4x4s) bad u Dipayan Nandi 37 ron (60 balls, 6x4s) – ryngkat lang kine ki shijur ki la noh synñiang 64 ron na ka bynta u wiket uba ar – hynrei kiwei pat ki nongtied kim shym la lah ban ïalehkai bha ha kaba ki rangkawang bol jong ka Mizoram ba kynthup ïa u Chhuankima (4/68) ki la lah ban shim ïa ki wiket na ka por sha ka por. Ha ka por ba dang kamai 76 ron bad khyllem shi wiket, ka Meghalaya ka la duh sa hynriew wiket na ka bynta 56 ron bad ka la paw kumba ka kynhun kan buh ïa ka thong kaba 200 ron duna.
Hynrei u Rudra u la lah ban ïalehkai bha hadien, da kaba noh synñiang 54 ron ryngkat u Mewankitbok Kharpuri (21 ron na ki 34, 4x4s). U Grish Raj Ray ruh u la pynbyrngia da kaba kamai 16 ron tang na ki san tylli ki bol, kiba kynthup ïa kawei ka saw ron (fours) bad ar tylli ki hynriew ron (Six).
Hadien kata haba wanphai ha ka boling, u Namewanki Pakyntein u la weng ïa lai ngut napdeng ki saw ngut ki nongtied ba nyngkong jong ka Mizoram ban pynkut ïa ka sngi da ka jingkheiñ kaba 3/25 ha ki 9 ober. U Mewankitbok uba la sdang ïa ka bol lyngba ka leg spin jong u, u la ïoh ban khur 1/27 na ki 10 ober bad u Gaurav Narleng 1/27 na ki 5 ober. Ka Mizoram ka dang don ïa u Malsawmmuanzela uba dang ïaineh ha ka tied (not out) uba la kamai 32 ron. Une u kapten u la mad tang 26 tylli ki bol, da kaba thlieh saw tylli ki saw ron (fours) bad ar tylli ki hynriew ron (six) ha ka jingïalehkai jong u haduh mynta.
