Shillong, Nohprah 15: Ka Family Strengthening Programme (FSP) ka shnat treikam jong ka SOS Children’s Village Shillong ka la sdang ïa ki prokram ïalap paidbah ban pynduh jait ïa ka shongkha khynnah (Child Marriage) ba la bthah daka tnat Ministry of Women and Child Development jong ka sorkar pdeng
Haka 13 tarik ka FSP ha ka jingïatreilang bad ka tnat District Child Protection Unit, District Legal Services Nongpoh, ka Dorbar Shnong Bhoirymbong, ka Dept of Social Work jong ka skulbah Martin Luther Christian University, ka Shillong Expressway Pvt Ltd bad ka Ministry of Road Transport and Highways ki la pynlong ïa ka jingïa ïaid paidbah.
Ha ryngkat ki jingthoh ki nongwan shim bynta ki la ïaid na Iew Bhoirymbong ban pynsngewthuh paidbah khamtam ïa ki nong shong dukan bad ki samla halor ka jingdonkam ban pynduh jait ïa ka shongkha khynnah.
Shuh shuh na ka liang ka SOS ka ong ruh ba ki ïeng skhem ha ka nongrim ban ïada ïa ki khynnah bad kan dang ïai bteng ban pynlong ki prokram pynsngewthuh paidbah ïa ka jingdonkam ban ban pynduh jait ïa ka shongkha khynnah bad ïa ki prokram kin sdang biang naduh u bnai Kyllalyngkot 2026.
