Mynjur ka sorkar ban pynskhem noh ïa ki kam shakri ki bonded nurse bad ki paramedic ha ka jylla

Shillong, Nohprah 09: Ka sorkar jylla ka la mynjur ban pynskhem noh ïa ki kam shakri jong ki palat 221 ngut ki bonded nurse bad ki paramedic ba la thung hapdeng u snem 2008 bad 2012.
Haba pynbna ia kane ka rai hadien ba la pynïaid ïa ka jingïalang ka kynhun Myntri ha ka sngi Baar, u Myntri Rangbah ka jylla u Conrad K Sangma u la ong, “hadien ki jingïasyllok kiba bniah bad ka tnat ka Koit ka Khiah bad ki bonded nurse, ka cabinet ka la rai ban ithuh ïa ka jingthung kam ba la leh ha kane ka por. Ki jingthungkam ba la leh ha kane ka por bad ki rukom treikam ba la pynbud, bad dei halor kane ba ka cabinet mynta ka sngi ka la rai ba ki 221 ngut ki bonded nurse bad ki bonded paramedic kiba la shah thungkam hapdeng ka snem 2008-2012, ngi la rai ban pynskhem ïa kito kiba la thungkam bad ban ithuh noh ïa ki.”
“Kumta katkum ka nongrim, ka jingthung kam na ka bynta kito ki kam yn ym lah ban leh naba ngi la dep ban pynskhem bad ithuh ïa ka jingthungkam ba la leh ha ka por kaba dei beit thik tang ïa ki bonded nurse bad bonded paramedic,” u la bynrap.
U Myntri Rangbah u la ong ba ki nongtrei adhoc ki dei ki nongtrei kiba la thung pyrshah ïa ki kam ba la mang hynrei na ka bynta ka jingthungkam kaba dei kumba ju long khlem da la lah ban bud bad la shu thung beit da kaba bynrap ba ka sorkar ka la shim ïa ka rai ban advertise ïa ki post jong ki adhoc employee ba la thung hadien u snem 2007 ban pynthikna ïa ka khuid suba bad kaba shit ba shai.
Ha kawei ka liang pat, u Sangma u la kdew ba ka kam ba ïadei bad ka bonded nurse bad paramedic ka long kaba pher. “Haba ngi ngam shapoh ka rukom treikam, ngi sngewthuh ba ki bonded nurse, ïa ka rukom jied wat haba leit sha ka pule puthi, ïa ka jingjied la leh bad halor ka nongrim ka jingïasoi ïateh bad halor ka jingthungkam kaba la ai,” u la ong.
U Sangma u la ban jur ba ki bonded nurse bad paramedic ki hap ban leit sha ka kam ban hap shah jied bad ki hap soi ïa ka bond, kaba dei ka jingmynjur kaba dei da ka aiñ.
“Haba ngi peit ba ka bynta jong ka bond ba ka don bad ka jingshisha ka long ba ka don ka jingïateh mynjur kaba ïaid katkum ka aiñ kaba la buh bad ba sa shisien pat ba la pynduh da ka snem 2013, bad dei halor kane ba la shim ka rai kaba shlur ban ithuh ïa kito kiba la shah thungkam bad ban shah ïa ki ban bteng ban trei ïa ki kam,” u la ong.