Shillong, Nohprah 09 : Ki paidbah nongshong shnong jong ka thaiñ Shilliang Um ha South West Khasi Hills District ki la kyrpad ïa u Myntri Rangbah ka Jylla u Conrad K Sangma ban buh noh da ka Administrative Block kaba thymmai ha ka thaiñ Mawsaw, da kaba kdew ïa ka jingeh ban ïoh ïa ki lad synshar ba kongsan namar ka jingjngai palat na ka jaka treikam jong ka Block.
Ha ka shithi sha u Myntri Rangbah ka Jylla ha ka sngi Ba-ar, ki nongshong shnong ki la pyntip ïa ka jingïar ka jaka bad ka jingbun ki nongshong shnong kaba la kot sha ka 118 tylli ki shnong ha ki 10 tylli ki GS Circle kaba la kot sha ka 35,604 ngut.
Ki la kdew ba ka jingbym don ka Administrative Block ha ka thain ka la khanglad ïa ka jingpynpoi biang por ïa ki skim sorkar sha ki paidbah, kam pynroi, ki jingshakri kiba ïadei bad ka pule puthi, ki jingïarap ha ka koit ka khiah, ki kam khajna, bad ka jingdonkam ba kyrkieh.
“Ka jingpynïoh noh da ka Administrative Block kaba thymmai ha ka thain Mawsaw kan wanrah ïa ki jingmyntoi kiba kongsan bad kiba neh, kynthup ïa ka jingpynïoh ïa ki jingshakri paidbah na ka bynta ki hajar ngut ki nongshong shnong nongkyndong. Ka jingpyntreikam kaba kham stet bad kaba kham paka ïa ki skhim bad ki prokram pynroi jong ka sorkar, ka jingpynkhlain ïa ki lad pule puthi bad ka koit ka khiah, ka jingpynduna ïa ka jingkit jingbah bad ka jingpynlut pisa na ka bynta ki briew ha ka ka jingkiew ha ka imlang sahlang ha kylleng ka thain,” la ong ka dorkhas.
Ki paidbah ki la pyntip ruh sha u Myntri Rangbah ka Jylla ba kumba hynriew ngut eiei ki trai jaka ki la pynpaw da ka mon sngewbha ban ai sngewbha ïa ka jaka na ka bynta ban buh ïa ka Administrative Block. Ki la kyntu ïa ka sorkar ba ka dei ban tuklar bad thaw kloi ïa katei ka Mawsaw Administrative Block ba la tyrwa.
