Pynkylla dur ki Cooperative ïa ka ïoh ka kot ki nongkyndong : Myntri

Shillong, Nohprah 09 : Ka NABARD Meghalaya Regional Office hynne ka sngi Ba-ar ka la pynlong da ka Meghalaya Cooperative Conclave ha State Convention Centre, Shillong, bad pynhap pyrda ruh ïa ka International Year of Cooperatives (IYC) 2025.
Ïa kane ka jingrakhe la wan ban pynphap pyrda da u Myntri ka tnad Cooperation ka sorkar jylla, Bah Methodius Dkhar kum u Kongsan.
Kiba poi sha kane ka prokram kaba kyrpang ki kynthup naduh ki heh na ka Registrar of Cooperative Societies, Meghalaya Cooperative Apex Bank, MBMA, NCDC, Urban Cooperative Banks, PACS, IVCS, FPOs, bad ki kynhun seng bapher bapher.
Ka jingïatai ka long beit kumno ban pynkhlain ïa ka jingtreikam naduh tynrai, ka jingpyntreikam da ki kor computer ha ki PACS, bad ka jingpynkylla sha ki kam bym dei ki kam ai ram na ka bynta ka jinglah ban kamai pisa.
Haba kren ha kane ka jingïalang, u Myntri u la kdew ïa ka kamram jong ki cooperative society la ka long ha ka rep ka riang, jingkyntiew ïa ka kamai kajih ha ki nongkyndong bad ka jingpynkhlain shuh shuh ïa jingtreikam kum ha ka ri masi khem dud, ri dohkha bad ka kam thain jain.
U la kdew ruh ïa ka sienjam ba ka NABARD ka shim haba ïadei bad ka jingkyrshan ïa ki nongkyndong, ki jingtrei bad ka jingpyntreikam ïa ki kor ki bor. Kumta u la kyntu ïa kine ki kynhun ba kin pyntreikam da ki kor ki bor khnang ba kin lah ban pynjur shuh shuh ka jingmih bad ka jingkiew stet ha ki kam jong ki.
La ïoh ruh ïa ka jingkren na ka Kong Joan R Blah, General Manager (OIC) NABARD kaba la pynshai ïa ka sienjam ba ka NABARD ka shim khamtam eh ban kyntiew ïa ka rukom treikam katkum ka juk mynta ïa ki cooperative lyngba kita ki cloud-based CBS, kor digital bad ruh ka jinghikai kaba kyrpang ban pynkylla dur ïa ki PACS.
Na ka liang u Richard Yanthan, IAS, Registrar of Cooperative Societies, u la banur ïa ka jingdonkam ban don ka jingïatrei lang hapdeng ki kynhun treikam na ka bynta ban pynkhlain shuh shuh ïa ki cooperative bad ruh ban don ki lad ki lynti kumno ban ïarap na ka bynta ban tehlakam ïa ki jingma kiba lah ban ktah ïa ka rep ka riang na ka jingkylla ki bor ka mariang.
Hadien kane la ïoh ruh ïa ka jingpynshai kaba kham bniah na ki riewshemphang, ki khana ba seisoh ha ka rukom treikam na ki FPO bad SHG, bad ka jingsam ïa ki khusnam sha ki IVCS kiba treikam bha kiba la pyntreikam ïa ki ePACS.