Nongstoiñ, Nohprah 08: Na ka bynta ban teh song ïa ka kur ka jait bad ban wanrah ïa ka jingïalong kawei ha baroh ki liang, ka seng kur Myrthong ha ka sngi saitjaiñ ba la dep ka la pynlong ïa ka dorbar bah ba nyngkong eh ha St Joseph Vianny Parish hall ha Nongkasen ha kaba da ki spah ngut ki dkhot na ki san tylli ki district kiba dei na ka kur kata naduh ri Bhoi, East, Eastern West,bad South West Khasi hills ki la ïa poi.
Ha katei ka sngi la pynïaid ïa ka dorbar da u bah P.W.Myrthong president jong ka kur ha kaba ka kur ka la ïatai sani bha halor kiba bun ki mat kiba donkam bad ka la ïakut ruh ba ka kur kan ïaleh katba lah ban bud ryntih bad pynneh pynsah ïa ki riti ki dustur ba la buh da ki longshuwa.
Nalor kata ka dorbar ka la ïakut ruh ban nang pynskhem shuh shuh ïa ka jingai jait sha ka kynthei kumba la ïalam da ki longshuwa man shuwa. Ha kajuh ka por ka dorbar da kawei ka sur ka la ïakut ban pyrshah jur ïa ka jingthmu jong kawei ka kynhun ban pynkylla noh ïa ka rikom ai jait na ka kmie sha u kpa. Nalor kata ka dorbar ka la ïakut ruh ba kan ym shah da lei lei ba kino kino kiba tang jait kin pyndonkam ïa ka jait Myrthong bad Marthong namar ki dei kajuh ka thymmei.
Ha kaba ïadei bad ka shongkha shong man, ka rukom bat khyndew bat shyiap bad ka rukom hiar pateng bad ka tip kur tip kha ka dorbar ka la ïakut ban bud ryntih kumba la ïalam da ki long shuwa. Ka dorbar ka la ïakut ban don noh ïa ki tnad trei kam jong ki samla bad yn sa pynskhem ha ka dorbar bah kaba ar kaba yn pynlong ha ki thaiñ Sohra.
U Dr Boss L.Myrthong u la kyntu ïa baroh ki kur ki jait ba kin kiar na ka jingim lyngkar, hynrei ki dei ban kynmaw ïa ka akor ka burom bad kin pynleit jingmut ha ki jingpule bad ba kin ïabeh ïa ka jingnang jingstad. Nalor kata u la kyntu ruh ba ki dei ban long kiba trei shitom bad kamai ïa ka hok.
U Rev Fr Myrthong u la kyntu ïa ki samla napoh ka kur, ba ki dei ban kheiñ kor ïa ka shongkha shong man bad shuwa ba kin jam sha katei ka bynta, ki dei ban ïaid da ka lynti kaba shisha, khnang ba kin lah ban saiñdur ïa ka longïing longsem kaba bha.
