Nongstoiñ, Nohprah 08: Ka jingbym biang jong ka mobile network ha ki shnong khappud ka la buh jingeh haduh katta katta ïa ki paitbah nongshong shnong, ong ki nongïalam ka FKJGP Kyrshai area unit.
U bah Probin Snar President ka FKJGP Kyrshai haba pyntip ha u nongthoh khubor ba halor katei ka jingbym biang jong ka mobile network, u la ong ba na ka liang jong ki nongïalam ka seng ki la leit ban ïakynduh ïa u bah Garod L.S.N.Dykes IAS Deputy Commissioner ka West Khasi Hills, ban kyrpad ïa u ba un ïakren bad ka Telecom Department jong ka sorkar.
Kumba long haduh mynta, ka Airtel Kompeni ka la wan ban buh ïa u tower ha shnong Kyrshai la slem, hynrei ym don Network. Kane ka la wanrah ka jingeh sha ki paitbah kiba ïakynduh jingeh, khamtam eh ki khynnah skul bad ki samla pule kiba donkam ban thoh ïa ki kot ki sla bad bad ban ïaleh exam da kaba shu online.
Utei u nongïalam ka seng u la ong ruh ba ha katei ka jingleit ïakynduh ïa u Deputy Commissioner ki la aiti ruh da ka jingthoh ba un shimkhia bad pynsted ïa ka kam. U la ong ruh ba bun bah ki shnong kiba don ha katei ka thaiñ, ki dei ki shnong kiba hap hapdeng ka jingïakajia khappud bad ka Assam. Kumta ka mobile network ka donkam haduh katta katta, namar lada don kino kino ki kynrum kynram ki shem shitom ban pyntip ha ka por kaba biang.
Ha kajuh ka por, u la ong ba ka sorkar Meghalaya ka la buh ïa ka Border Police Out Post ha Kyrshai bad ka jingbym biang jong ka network, ka bun jingeh ruh wat ïa ki pulit ba kin pyntip ïa ki jingdonkam ha u Superintendent of Police jong ka District, khamtam ïa ki kam ki bym da donkam ban da pynlut sngi ha ka ban wan haduh Headquarter ha Nongstoiñ. Utei u nongïalam ka seng u la ong ruh ba na ka liang u Deputy Commissioner u la kular ban shimkhia halor katei ka jingkyrpad jong ki.
