Nongpoh, Naitung 06: Ka Umshaken SC kala long ka lahduh haka lympung ïalehkai phutbol Mathan League bala pynlong da ka Mathan Sports Association (MSA) hadien ba kala lah ban pynliem noh ïaka Umjari SC haka phainal jong katei ka lympung kaba la pynlong mynta ka sngi ha madan Umshaken.
Ïa katei ka lympung la pynhap pyrda noh mynta ka sngi da u Bah Mayral Born Syiem MLA ka Nongpoh kum u kongsan haka jingdonlang ki nongïalam jong ka MSA ba kynthup ïa u Bah Brekstar Shylla President, T Khymdeit General Secretary, Bah R Mangu Lyngdoh Raid bad kiwei kiwei ki riew rangbah bad nongïalam shnong.
Haba phai sha ka jingïakhun phainal ha katei ka sngi ka jingïaleh kala long kaba shongshit bala wan ruh ban sakhi da ki spah ngut ki paidbah nong-kyrshan jong kitei ki 2 tylli ki kynhun ha kaba ki rangïalehkai jong baroh 2 kynhun kila trei shitom ban rah ïaka nam lahduh jong katei ka lympung hynrei hapdeng ka jingïakhun kaba jur ka Umshaken kala lah ban pynliem noh ïaka Umjari da 5-1 kol ban rah syndon ïaka nam lahduh jong katei ka lympung.
Haba kren ha katei ka sngi naka liang u Bah Mayral Born Syiem MLA ka Nongpoh u la ai ka jingïaroh ïaka Mathan Sports Association kaba la shim ïa katei ka sienjam ban pynlong kum katei ka lympung naka bynta ban lum ban lang ïaki khun samla hapoh ka raid ban don ka jingïatylli bad kumjuh ruh ban sei madan ïaka sap kaba ki don haka kam ïalehkai phutbol da kaba kyrpad ruh ïaki rangïalehkai ha katei ka sngi ban pyndonkam hok ïaka sap kaba ki don khnang ba kin long ki khlur ba tyngshaiñ haka jingim jong ki bad kin long ruh ki khlur ïalehkai ba pawnam.
La sam ruh ïa ki khusnam ha katei ka sngi da ka song pisa bad kumjuh ruh ka trophy sha ka kynhun kaba jop.
