Khliehriat nohprah 06 : Ka ophis jong ka Meghalaya AIDS Control Society (MACS) lyngba ka ophis jong ka District AIDS Control Officer (West & East Jaiñtia Hills), lem bad ka District Integrated Strategy for HIV/AIDS (DISHA), Khliehriat Cluster, hynnin ka sngi ka la pynlong ïa ka prokram World AIDS Day 2025 ha Khliehriat Community Hall East Jaiñtia Hills District
Haba kren ha ka jingialang ka Assistant Commissioner, East Jaiñtia Hills District, ka E. A. Sangma, MCS ka la ban jur halor ki jingdonkam ban shim ïa ki lad ban iada na u khñiang jingpang HIV ka la ong ruh ba baroh ki dei ban ioh ïa kajuh ka bhah khamtam kito ki briew kiba im bad u khñiang HIV bad kyntu ruh ba ym dei ban peit beiñ ïa ki.
Ka Sangma ka kyntu ruh ïa ka im lang ka sah lang ban ïa don bynta lang bad kyntu ïa ki samla ban iashimbynta lang ban dup lah ban rat dyngkhong ïa u khñiang HIV.
U Principal jong ka Dkhiah East Secondary School, Dkhiah, u Dr B. Nongtdu, u la ai ka jingkhublei sngewnguh ïa ka kynhun kaba la pynlong ïa kane ka prokram kaba wanrah ruh ïa ka khubor ba snewtynnad ban don ka jingkitkhlieh ban kyntiew ïa ka longbriew ka man briew ha ka im lang ka sah lang ban rat dyngkhong ïa ka jingpang HIV, u la ong ruh ba man la u ne ka briew ki don hi la ka jong ka jingsngewtynnad ban leh ïa kaei kaei kaba bha bad kumta da ka jingiatreilang yn lah ban wanrah ïa ka mynsiem jingleh sbun, ka jingsngew lem bad ban kyrshang lang iwei ïa iwei pat. Haba kren pat ha kaba iadei bad ka jingpang HIV AIDS, u la ong ba ki don ruh ki briew kiba shah ktah ha u HIV/AIDS dei na ki daw bapher bapher bad donkam ban burom ïa ki ruh kumjuh bad ong ruh ba ka long kaba donkam ban pynphriang ïa ki jingpynshai sha ki longiing longsem, sha ka imlang ka sahlang bad ban pynshlur ruh ba kin mih shakhmat ban phah leh test HIV/AIDS.
Ha kane ka prokram World AIDS Day ka la don ruh ka jingiakop ha ka jingiathir ne jing ïa tai nia halor ka jingpang HIV/ AIDS bad ha kane ka jingiakren ne jingia tai, ka kong Jimyam Rasong, ka la jop ha ka kyrdan ba nyngkong bad ka Niwanshia Lamurong ka la long ba ar bad ka Geta Lyngdoh ka long ba lai.
Kiba la ai jingkren ki kynthup ruh u District TB Officer cum District AIDS Control Officer, East & West Jaintia, Dr P. Lamare bad u Panel Lawyer, District Legal Services Authority(DLSA), East Jaintia Hills District, u bah P. N Swer.
Kiba la ïa don lang ha kane ka prokram ki kynthup u Additional Superintendent of Police, East Jaiñtia Hills District, u bah S. Paslein, MPS,u Sub-Inspector (SI) Police, East Jaiñtia Hills District, u bah S. Buam, u District TB Officer cum District AIDS Control Officer, East & West Jaintia Hills, Dr P. Lamare, u Cluster Programme Manager, District Integrated Strategy for HIV/AIDS, (DISHA) Jaintia Cluster, u bah Sandy Tariang, ka Programme Manager, MCSWA, ka kong Rinibeth Patlong, ki ASHA bad kiwei kiwei.
