Ka Kur Snaitang kan ym mynjur satia ban ai jait Kpa: President kur Snaitang

Nongstoiñ, Nohprah 03 : Na ka bynta ban ai mynsiem bad pynshlur shuh shuh ïa ki samla kynthei bad shynrang, ka kur Snaitang Nongstoiñ zone ha sngi hatmajai, ka la pynlong ïa ka dorbar kur kaba saw ha Nongstoiñ na ka bynta ban ïatai bad ïaphylliew jingmut ïa kiba bun ki kam kiba don kam jong ka kur.
Ha katei ka juh ka sngi ka la pynkup burom ruh la ïa ki lai ngut ki samla kiba la wan shakhmat ha ki jingpule jong ki, kita ki long ka Miss Amazingrace Snaitang kaba la wan sha khmat ha ka Final Exam Class X 2024-25 kaba la ïoh 81.5 % ha ka total marks. Ka miss Phidarisha Snaitang kaba la wan shakhmat ha ka Final Exam jong ka Class XII kaba la ïoh 80.4 % ha ka total marks bad u samla Springfield Snaitang, u ba la wan shakhmat ha ka Final Exam 2024 -25 ha ka Class XII, ha kaba u la ïoh 87.2 % ha ka total marks. Ïa ka jingpynkup burom bad ki khusnam la sam da u bah Wanbok Snaitang President ka central body jong ka kur Snaitang.
Ïa ka dorbar kaba saw la pynlong ha MECOFED hall New Nongstoiñ ha kaba la ïadonlang ruh ïa ki nongkitkam jong ki lai tylli ki zone ka Shillong zone, Mawkyrwat zone bad ka Raibah zone. La pynïaid ïa ka dorbar da u bah R.Snaitang President ka Nongstoiñ zone bad la ïoh ban pynsngew ïa ka jingtrei kam jong ka kur, na ki lai tylli ki zone bad la ïoh ruh ïa ka jingkren na u bah Wanbok Snaitang President ka central body.
U bah Wanbok haba ai jingkren ha katei ka sngi, u la ong ba naduh ba la sdang ban thaw ïa ka dorbar kur hapoh ka bri u Hynñiewtrep, ki rangbah jong ka kur Snaitang ki la saiñ dur ruh ïa la ktien phirat kaba ong “Ban im, ban roi bad ban neh”.
Ka jingthmu kaba kongsan ka long ba ki longïing longsem jong ka kur, la ki dei kiba shong ha nongkyndong ne ha sor bad ha kino kino ki bynta hapoh ka jylla, ki dei ban im ban kharoi bad ban neh ha baroh ki bynta kum ha ka longbriew man briew, ka tip kur tip kha, ka burom ka akor, ka kamai kajih, ka jingnang jingstad bad khamtam eh ba baroh ki longïing long sem hapoh ka kur ki dei ban im ka jingim tip briew tip blei.
U bah Snaitang u la ong ruh ba ka kur ka sngew tynnad bad ka kmen, lada ki longkmie jong ki longïing longsem ki kha bun ki khun, namar ka jingbun khun ka dei ka bynta ba kongsan ka ban pynroi ïa ka jait ka kynja.
U la ong ruh ba ka kur ka angnud ruh ba baroh ka ki longïing longsem hapoh ka ka kur, kin don ïa ka mynsiem jong ka jingïatip lem ïa ki para kur haba ki ïakynduh ïa ki jingeh kum ha ka pang ka shitom bad kiwei kiwei.
Ha kajuh ka por, u la ong ruh ba ka kur Snaitang kam kwah da lei lei ban pynkylla ïa ka riti ka dustrur kaba ki longshuwa naduh hyndai kulong kumah ki la ïam bad kata ka dei ban shim jait na ka kmie.
Nalor kata u la pynshai ruh ha kaba ïadei bad ka jingmih pyrthei jong ki seng kur ba bun jait, ba kynthup ruh ïa kawei ka seng kaba dawa ban ai jait ha u kpa. Hynrei, ha kaba ïadei bad kata na ka liang ka kur Snaitang hapoh ka bri u Hynñiewtrep, ka la rai ba kan ym pdiang da lei lei ruh bad kan ym leit ban ïadon bynta bad kino kino ki seng kur kiba don ha kane ka jylla.