New Delhi, Nohprah 04: Katkum ka rai ba la ïoh ha ka plenary meeting kaba 72 jong ka North Eastern Council (NEC), kaba la long ha Agartala ha u bnai Nohprah, 2024, ka Tnad Development of North Eastern Region (DoNER) ka la thaw ïa 8 tylli ki High-Level Task Force (HLTF), ha kaba ïa kawei pa kawei la khlieh da u Myntri Rangbah jong ka thaiñ shatei lammihngi. Ïa ka HLTF halor ka North-East Economic Corridor (NEEC) la pynïaid da u Myntri Rangbah ka jylla Mizoram, ha kaba u Myntri ka Sorkar Pdeng ba dei peit ïa ka Tnad DoNER bad ki Myntri Rangbah jong ka jylla Assam, Meghalaya bad Manipur kum ki dkhot.
Ka jingbthah jong ka HLTF halor ka NEEC, nalor kiwei pat, ka kynthup ïa ka jingbishar bniah ïa ki jingdon jingem kiba la don lypa ha ka ïoh ka kot bad ka rukom bei tyngka ha ka thaiñ shatei lammihngi; ka jingithuh ïa ki jingduna bad ka jingthaw ïa ki lad ki lynti ban khring ïa ki nongbei tyngka ha ka thaiñ. La pynlong lai tylli ki jingïalang jong ka HLTF halor ka NEEC.
Ïa ki projek ba la mynjur hapoh ka skhim PM-DevINE la pyntreikam da ki tnat pyntreikam (IA) ba dei peit jong ki sorkar jylla bad ka jingkitkhlieh ba hakhmat eh ban buddien ïa kine ki projek ka shong ha ki sorkar jylla/IA ba dei peit. Ïa ki projek la buddien ruh da ka Tnad DoNER lyngba ki Field Technical Support Unit (FTSU), ki Project Quality Monitor (PQM) bad ki Third-Party Technical Inspection Agency (TPTI) bad ki jingpeit bniah da ki heh ophisar jong ka MDoNER bad ka North Eastern Council (NEC), bad kumjuh ruh ha ka por ba pynlong ïa ka jingïalang peit bniah.
Ïa ki skhim ban tehlakam ïa ka jingshlei um bad ban ïada na ka jingtwa khyndew la thaw bad pyntreikam da ki Sorkar Jylla ba dei khmih katkum ka jingthmu ba kongsan jong ki. Ka Sorkar Pdeng ka ïarap lang ïa ki sienjam jong ki sorkar jylla. Ban pynkhlaiñ ïa ki lad jingpynbeit ba kongsan na ka bynta ban ïada na ka jingshlei um, ka Sorkar Pdeng ka la pyntreikam ïa ka Flood Management Programme (FMP) ha ka XI & XII Plan na ka bynta ka jingai jingïarap na sorkar pdeng sha ki Jylla na ka bynta ki kam kiba ïadei bad ka jingtehlakam ïa ka jingshlei um, ka jingïada na ka jingtwa khyndew, ka jingpyntuid ïa ka um, bad kiwei kiwei kiba la bteng hadien kum ka bynta jong ka Flood Management and Border Areas Programme (FMBAP) kum ka skhim ba la bei tyngka da ka sorkar pdeng na ka bynta ka samoi naduh 2017-18 haduh u snem 2020-21 bad la pynjlan shuh shuh haduh u snem 2025-26. Shuh shuh, ha kine ki 10 snem ba la dep, hapoh ka Scheme jong ka NEC bad ka Non-Lapsable Central Pool of Resources (NLCPR), 24 tylli ki projek, kiba ïadei bad ka jingshlei um / ka jingïada na ka jingtwa khyndew, kiba shongdor T.345.74 klur la mynjur ha ki Jylla ka thaiñ shatei lammihngi.
Ïa ki projek ba ïadei bad ki jingdon jingem ba la mynjur la pynrung ha ka rynsan PM-Gati-Shakti na ka bynta ban pynbha ïa ka jingthmu. Ïa ka jingpeit bniah ha ki jaka treikam la leh lyngba ki jingleit jngoh ïa ki jaka bad ki jingpeit bniah ba la pynlong da ki ophisar jong ka NEC bad ka Tnad DoNER. La peit ruh ïa ka rukom pyntreikam da ki kynhun lyngba ka jingïatreilang jong ki PQM, ki TPTI bad ki FTSU.
Ïa kane ka jingtip la ai da u Myntri Khynnah ka Tnad Development of North Eastern Region Dr. Sukanta Majumdar ha ka jubab ba shu thoh ïa ka jingkylli ha Rajya Sabha mynta ka sngi.
