Ka pyrthei shityllup ka burom bad ñiewkor ïa kiba don jingthut ha ki dkhot met: BDO Rambrai

Nongstoiñ, Nohprah 02: Ka Ophis jong ka District Social Welfare Officer West Khasi Hills District, ka la ïoh ban rakhe ïa ka ‘International Day for Persons with Disabilities’, lane ka Sngi rakhe ïa ki briew kiba don jingthut ha ki dkhot met, kaba ka phang ka long, ‘Fostering Disability-Inclusive Societies’, na ka bynta ban kyntiew ïa ka jingkiew ha ka imlang sahlang. Ïa kane ka prokram mynta u snem la ïoh ban pynlong ha ka ïing dorbar jong ka R.L Iew Rambrai.
U Bah E.Lyngdoh MCS, BDO Rambrai C&RD Block, u la long kum u Kongsan ha kane ka sngi, ha ka jingïadonlang ka kong D.Pakynteiñ DSWO, ka D.Biswas ka Rehabilitation Officer ka National Career Service Centre for Differently Abled ka sorkar India, ka Kong M.B. Sawkmie Physiotherapist & Manager DRCDA Nongstoiñ, Bah M.Diengdoh, DEF I/C UDID Mawkyrwat nongmihkhmat na ka DLSA bad kiwei.
La sdang ïa kane ka prokram da ka jingkren pdiang na ka kong D. Pakynteiñ DSWO, kaba la pdiang sngewbha ïa baroh ki briew kiba don jingthut ha ki dkhot met kiba wan sha kane ka jingïalang. Ka la ai khublei kyrpang eh ïa ki briew kiba don jingthut ha ki dkhot met, ba ki dei ban sngew kmen ha kum kane ka sngi. Namar, ha shi tyllup ka pyrthei la ithuh bad ñiew burom ïa ki, la ki long ha kano kano ka rukom ruh. Ka la ong ba ka jingwan shim bynta shitrhem jong ki, ka pynlong ïa kane ka sngi, ka sngi kaba jop.
U Bah E.Lyngdoh haba kren kum u Kongsan, u la pynpaw ïa ka jingkmen jong u ban don bynta lang ha kane ka sngi na ka bynta ki briew kiba don jingthut ha ki dkhot met hynrei kiba lah pat ha kiwei pat ki liang.
U la pynpaw ba ki briew kiba don jingthut ha ki dkhot met, kim dei ban sngew lehraiñ ne sngew pohjait satia, hynrei ki dei ban sngewbha ïa la ka jong ka jingim bad ban sngew mar katjuh ha ka imlang sahlang.
U la pynpaw ba ha kane ka juk mynta, ki briew kiba don jingthut ha ki dkhot met ki don ka lad ban ïashim ha ki jingïakhun eksamin kiba pher bapher, ki jingïalehkai, ki kam bapher bapher kiba pynshong nongrim ha ka jingtbit. Ka sorkar ka la wanrah ruh shibun tylli ki skhim bad ki prokram jingïarap na ka bynta ban kyrshan ïa ki.
U la ban jur ruh halor ka Rights of Persons with Disabilities Act 2016, ka aiñ kaba ïada ïa ka hok jong ki. U la pynshlur ïa ki riew kiba don jingthut ha ki dkhot met ban pynrung kyrteng ïa ka UDID card, ban ïoh ïa ki jingmyntoi bapher bapher jong ka sorkar.
U la pynkynmaw ruh ïa ki paidbah ïa ka kamram jong ki ba kin kiar na ka jingñiew beiñ ïa ki. Hynrei ban ai jingkyrshan ïa ki briew kiba don jingthut ha ki dkhot met ha kano kano ka por ba donkam.
Ki nongmihkhmat na kiwei pat ki tnad ki la ïasam ruh ïa ki jingtip kiba kongsan shaphang ka hok jong kiba thut ha ki dkhot met, ki jingïarap aiñ, ki skhim jingïarap, bad ki rukom jingïarap bapher bapher kiba lah ban ïoh da ki briew kiba don jingthut ha ki dkhot met.
Kiwei pat ki bynta kiba la lah ban pyndep ha kane ka sngi ki long ka jingot cake, ka jingsam ïa ki khusnam sha ki nongjop ha ki jingïalehkai bapher bapher ba la pynïaid da ka DSWO bad ka jingai sngewbha sha baroh ki briew kiba don jingthut ha ki dkhot met kiba don lang ha kane ka prokram.