Nongstoiñ, Nohprah 01: Na ka bynta ban pynkhlaiñ shuh shuh ïa ki dorbar kur ka Synjuk Ki Rangbah Kur Ka Bri U Hynñiewtrep West Khasi Hills District, ha ka sngi saitjaiñ ka la pynlong ïa ka jingïakynduh lang ha MECOFED Hall New Nongstoiñ ban ïatai halor kiba bun ki mat kiba don kam kumno ban pynkhlaiñ shuh shuh ïa ki dorbar kur hapoh ka district.
Ïa katei ka jingïalang la pynïaid da u bah R.S Khardewsaw president ha ryngkat ka jingïadonlang jong ki nongkitkam jong ka synjuk jong ka sengkmie na Shillong, ba kynthup ïa u bah Aristole Lyngdoh Mawphlang vice president ka seng kmie, bah Robertjune Kharjahrin Legal Adviser bad kiwei kiwei ki nongkitkam jong ka Synjuk sengkmie.
La ïoh ïa ka jingpynshai na u bah P.W.Myrthong Secretary halor ka jingthmu jong ka synjuk bad ka jingtreikam naduh ba la sdang ban seng ïa ka ha West Khasi Hills. Hadien ka jingpynshai la ïoh ïa ka jingkren na u bah Aristole Lyngdoh Mawphlang u ba la ïadon bynta lang naduh ba sdang ban thaw ïa katei ka synjuk ha ka por ba u (L) bah H.S.Shylla u dang long u CEM ha Khasi Hills Autonomous District Council.
Utei u rangbah haba ai jingkren ha katei ka sngi, u la ong ba ka daw kaba kongsan eh kaba la pynlong ïa u (L) bah H.S.Shylla, ban khot ban wer bad ban pynsngewthuh ïa ki rangbah kur ba ki hap ban thaw noh da ka synjuk, ka dei halor ka nongrim jong ka jingnang hiar jong ka jaitbynriew, ha ka kheiñ kur kheiñ jait kaba la wan rah shibun ki jingeh ha ka long briew man briew bad kaba la ktah ruh wat haduh ka synshar ka khaddar ha ki shnong ki thaw.
U la ong ruh ba hapdeng jong kiba bun ki jingeh ba ka synjuk ka ïaid lyngba, kam shym kynran dien khamtam eh ha dien ba kawei na ki kynhun kiba thmu ban pynkylla khongpong ïa ka khein kur kheiñ jait ka la mih pyrthei bad ka la pyrshang ban tuklar bad dawa na ka sorkar ba kan ithuh bad pdiang ïa ka jingdawa jong ki.
Nalor kata u la ong ruh ba ha ka synjuk ka la ïaksaid dohïap ban ym ailad ïa kino kino ki jingthmu ban pynkylla khongpong, khamatam eh ha ka kheiñ kur kheiñ jait. Namar ba kan pynklumar ïa ka jaitbynriew la ka long ha ka rukom bat khyndew bat shyiap, ka shongkha shong man bad kiwei kiwei bad da ka jingïakhun khlem shong thait jong ka synjuk la lah ban pynlong aiñ ïa ka rukom kheiñ jait ba baroh ki nongshong shnong ha ka jylla kiba dei ki Khasi ki hap ban ai jait sha ka kmie, kumba la ïalam da ki longshuwa naduh hyndai kulong.
U bah Kharjahrin haba ai jingkren ha katei ka sngi u la kyntu ïa ki nongïalam jong ka synjuk, ba ki dei ban nang pynkhlaiñ shuh shuh ïa ki dorbar kur namar lada khlaiñ ki dorbar kur, ki dorbar shnong, dorbar hima bad ka jaitbynriew ka khlaiñ. Hynrei lada ki dorbar kur ki tlot ki nongwei nongar, ki wan wir wan hap ki ïoh lad ban rung katba mon bad ban pharia ïa ka jaitbynriew.
