Kyntait ka Mahadev Khola Trust ïa ka jingkynnoh shong beaiñ dei ki ïing ba hiar pateng na u Pandit Mishra

By Mawphor Editor On Dec 1, 2025

Shillong, Naiwieng 29 : Ka Mahadev Khola Welfare bad Trust ka sngewpyrshah jur ïa ka jingkynnoh jong ki kynhun Sengbhalang ba ka ïing ka sem u nongïalap niam ba sah ha Mahadev Khola kum ki “nongshong shnong be-ain” haba kyrpad ruh ïa ka Sorkar Jylla ban weng noh ïa kane ka kyntien bad ai ka jingpynshai kaba shai kdar ïa ka kyrdan jong ki.
Ha ka kyrwoh ba pynlait ha ka sngi Thohdieng, ka Trust kala ong ba ki ïing ki sem ki dei kiba hiar pateng na u (L) Pandit Shiv Narayan Mishra, kaba ki pateng jong u, kila pyndep ïa ka lehniam leh rukom ba man ka sngi bad pynïaid ïa ka Mahadev Temple da ki pateng. Kala ban jur ba kine ki longïing ki la shong la sah ha kane ka jaka naduh shuwa ka jingïoh laitluid bad hashuwa ba ka Meghalaya ruh kan ïoh ïa ka Jylla ba pura ruh.
Haba ñiew ïa ka jingpynman nongkyntur pud kum ka jingkam ka bym dei bad kaba ktah jur, ka Trust kala pynksan ba kum kine ki jingkynnoh ka dei ka jingñiew poh ïa kine ki longïing bad ka synñiang jong ki nongsumar ïa kane ka Temple, haba ai ding ruh ïa ka jingsngew ba pyrshah ïa ki nongshong shnong bar jylla. Kala ban jur ba ka Mahadev Khola Dham ka dei ka jaka kyntang ban mane Blei, ym ka jaka ban leh politics haba maham ba kano kano ka jingpynthut ïa kane ka jaka kan ktah ïa ka jingsngew ki paid Hindu bad kan wanrah ïa ka jingsngewkhia halor ka hok niam.
Haba khot ïa ka jingïatylli hapdeng ki jaitbynriew, ka Trust ka la ong ba kane ka kam ka dei shaphang ka hok bad ka burom na ka bynta ki longïing kiba la sumar ïa ka temple ha ki pateng bynriew. Ka la maham ba lada ka sorkar kam lah ban leh eiei, kan leit sha ka ophis jong u Myntri Rangbahduh ka Ri bad kan wad ïa ki lad ki lynti katkum ka aiñ.
Ka Trust ka la kyntu ruh ïa ka sorkar ban ithuh paidbah ïa ka Mahadev Khola Dham kum ka jaka leh niam kaba la rim ban pynthikna ïa ka jingshngaiñ kaba biang, ban pynthikna ïa ka jingmane Blei kaba khlem sangeh, bad ban bat ïa ki hok jong ka riti synshar jong baroh ki nongshong shnong.