Shillong, Naitung 5 : Ka ïing bishar Supreme Court (SC) mynta ka Sngi Ba-Ar ka la pynsangeh shwa ( stayed) ïa ka jingpynmih hukum ka ïing bishar High Court jongka jylla Meghalaya ban pynpra noh ïa baroh ki karkhana Coke hapoh ka jylla.
ïa kane ka mukotduma la bishar da ki Nongbishar Justice Surya Kant, Justice JB Pardiwala, .Tangba ka ïing bishar ka la hukum pat ba kine ki karkhana Coke kim dei pat ban treikam katba kane ka hukum pynsangeh shipor ka dang treikam.
ïa kane ka mukotduma la ujor sha ka ïing bishar Supreme Court da ka JMK Coke Industry pvt Ltd. Kine ki nongujor jongka kompani ki la pynpaw ba ka ïing bishar High Court ka khlem ailad ïa ki ban ïasaid hakhmat jongka shwa ba kan pynmih ïa kane ka hukum ban pynpra ïa kine ki karkhana coke bad kumjuh ruh ban khang ba kin treikam ne wat ban plie ïa kiba thymmai ruh.
Kine ki nongmudui ki la pynpaw ruh ba ym don ki kyndon aiñ ban ïoh jingbit na ki bor ba dei peit ïa ka mariang ban seng ïa ki karkhana coke bad kumta kane ka jinghukum ban pynpra ïa kine ki karkhana kan wanrah ka jingduh nong kaba khraw ïa ki.
Halor kine ki jingmudui bad pynpaw jongki ka ïing bishar SC ka la ailad ïa ki ban leit ujor biang sha ka ïing bishar High Court bad na ka liang ka ïing bishar Supreme Court ka la kyrpad ïa ka ïingbishar High Court ka Meghalaya ba kan ailad bad pdiang ïa ki jingmudui jongki bad ha kajuh ka por ban bishar bniah biang ïa ki hukum ba la pynmih ha ka 24.05.2022 bad 21.06.2022.
Halor kine ki nongrim ka ïing bishar SC ka la pynsangeh shwa ïa kane ka jinghukum jongka ïing bishar HC ban pynpra ïa kine ki karkhana Coke tangba kim dei pat ban plie ne ban treikam katba dang ïaid ka jingbishar.
Halor ka jingïai bteng ki jingtih dewiong beaiñ haka jylla ka ïing bishar High Court jongka jylla ka la thung ruh ïa u Justice BP Katakey ban bishar bniah la ka sorkar ka pyntreikam hok ne em ïa ki hukum jongka ïing bishar SC bad jongka National Green Tribunal (NGT) bad kumjuh ruh ban lilam ïa uto u dewiong uba la dep tih naduh mynshwa da ka Coal India Limited.
Na kal iang ka NGT ruh mynshwa ka la thung ïa ka committee ban khlieh da u Justice Katakey hi ban peit bniah ïa kine ki jingtih dewiong beaiñ ha ka jylla Meghalaya.
Hadien ba la thung da ka ïing bishar High Court na ka liang u Justice Katakey u la aiti ïa ka kaiphod ba 41 sla ha ka 23.5.2022 kaba pynpaw ba lait noh tang ka jingpynmih ïa ka Meghalaya Mineral ( Prevention of Illegal Mining, Transportation and Storage Rules 2022 ha ka 24.3.2022 ïa kiwei kiwei ki hukum ka ïing bishar SC bad NGT ym shym la pyntreikam da ki bor sorkar jongka jylla Meghalaya. Halor kane ka ïing bishar HC ka la pynmih biang ka hukum ba ka sorkar ka dei ban pyntreikam ïa baroh ki hukum hapoh saw taiew.
Ka ïing bishar HC ka la bthah ba dei ban shim khia noh ban pyndep ïa ka kam ban lilam noh ïa u dewiong ba la dep tih khnang ban ym ïoh ban ïa pynmilai lang bad uba dang tih thymmmai ban lait na ka jingaidaw ba une u dewiong uba thymmai ruh u dei uto u dewiong uba rim uba la dep tih lypa.
