Thaw u DC da ka Joint Enquiry Committee ban tohkit ïa ka jingkem pang ki khynnah ka JNV Rymbai

Khliehriat, Naiwieng, 29: U Deputy Commissioner jong ka East Jaiñtia Hills District u la thaw da ka Joint Enquiry Committee ban pynlong ïa ka jingtohkit halor ka jingkynnoh ba ki khynnah skul kiba pule ha Jawahar Navodaya Vidyalaya (JNV), Rymbai la suba ba ki la ïohpang na ka jingbam ïa ka bam ba la sniew.
Kane ka jingjia ka la paw pyrthei ha ka 22 tarik mynta u bnai. Bun ki khynnah skul kiba la ïohpang la pynkit ïa ki ban ïoh jingsumar ha PHC Rymbai.
Ïa kane ka Joint Enquiry Committee la khlieh da u Sub-Divisional Officer (SDO)- Sadar, East Jaiñtia Hills District u Manish Kumar bad kynthup ruh ïa u Food Safety Officer (FSO), East Jaiñtia Hills District, na ka ophis District Medical & Health Officer (DM&HO), East Jaiñtia Hills District, Sub-Divisional School Education Officer (SDSEO), East Jaiñtia Hills District bad na ka District Child Protection Officer (DCPO), East Jaiñtia Hills District.
Kane ka Committee ka la pynlong ïa ka jingjurip ka jingtohkit kaba bniah ban lap ïa ka daw tynrai halor ka jingkem pang jong ki khynnah ba la suba ba dei na ka daw ka bam ba ki bam.
U Deputy Commissioner u la bthah ruh ïa ka Committee ba kan aiti ïa ka kaiphod ynda la pyndep ïa ka jingtohkit.
Ha ka 26 tarik, Naiwieng, u Principal jong ka Jawahar Navodaya Vidyalaya (JNV), Rymbai, u Dr. Raj Kumar u la phah ïa ka kaiphod sha u Deputy Commissioner Cum Chairman ka Vidyalaya Management Committee (VMC), East Jaiñtia Hills District kumjuh ruh sha ka Vidyalaya Management Committee (VMC), East Jaiñtia Hills District ha kaba la batai lut ïa baroh kiba la jia.
U Principal u la pynpaw ha ka kaiphod ba ka dei ruh na ka daw ka jingkylla ha ka jinglong ka suiñ bneng ha kaba 17 ngut ki khynnah kynthei ki la ïoh pang shit, suh khriat bad jyrhoh bad ha ka 22 tarik, Naiwieng ïa kine ki khynnah la phah ban leit shwa sha ïing ban ïoh ïa ka jingsumar kaba bha khnang ban ïada ïa kiwei pat ki khynnah skul ban lait na ka jingïabit na ka jingpang.
U la pynpaw ruh ba ha ka 23 tarik, Naiwieng, katto katne ki khynnah skul ki la ïoh pang kpoh.
U Principal u la ïathuh shuh shuh ba hapoh kane ka skul ka don tang kawei ka Nurse bad ki dawai ruh kim biang bha. Ki khynnah ruh ïa mynta shi por ki dang ïa shong lang ha kawei ka kamra ne ka Hall.
U la ïathuh ba baroh ki khynnah kiba la shitom ki don haduh 38 ngut bad bun na ki ki dei ki khynnah kynthei.
“Naduh ka 25 tarik, Naiwieng napdeng ki 38 ngut ki khynnah kiba la shitom, 11 ngut ki la lah ban wan phai biang sha skul bad ym don wat tang iwei ruh i khynnah ruh ban thiah hapoh Hospital,” la pynpaw u Principal.
Ka Nurse kaba trei hapoh JNV Rymbai kaba ju ïakren bad ki khynnah skul kiba dang don hapdeng ka jingshah sumar ka la ong ba mynta ki khynnah ki la kham khlaiñ.