Nongpoh, Naiwieng 29: U Deputy Commissioner ka Ri-Bhoi u Abhilash Baranwal mynta ka sngi u la pyntip ba ka sorkar jylla lyngba ka tnad Transport kan sa shim jaka ban pynheh ïa ka surok Umroi Airport na Umroi Madan kaba pynïasoh shaduh Umroi Airport.
Haba kren sha ki lad pathai khubor na ka liang u Abhilash Baranwal u la ong ba la khang pyrshah ban shna ïa kino kino ki jingtei thymmai ha shilynter ki rud surok ha katei ka thaiñ, ba ka sorkar ka thmu ban shim jaka kaba dei hapoh 8.5-meter ha baroh ar liang jong u surok bad lada ki don kino kino kiba thmu ban tei iing ne kino kino ki jingshna ki hap ban pan jingbit shuwa na ka ophis u Deputy Commissioner.
U la pyntip ruh ba kino kino ki jingleh kiba khlem pan jingbit la ki long shipor ne kiban neh shirta ha shilynter kitei ki jaka ba thmu ban shim ka sorkar kin nym ioh satia ïa ka bai lutksan, la ka dei ka jingtei shimet ne ki jingtei na ka bynta ka khaii ka pateng bad kane ka hukum kan treikam mardor.
