Na kylleng ka pyrthei poi ki nongrep Organic ha ka International Organic Event ha Shillong

Shillong, Naiwieng 29 : Ka jingïakynduh lang kaba saw sngi jong ki nongrep organic ba la tip kum ka International Organic Event ba kynthup ïa ka da ka APEDA Buyer–Seller Meet, 1st Northeast India Organic Week, bad ka 4th IFOAM World Organic Youth Summit (28 Naiwieng – 01 Nohprah 2025) la plie paidbah mynta ka sngi Saitjain ha Courtyard by Marriott, Shillong.
La pynlong ïa kane ka prokram da ka Tnat ka rep ka riang & ka bha ka miat jong ki nongrep, Sorkar Meghalaya, ha ka jingïatreilang bad ka MEGNOLIA, APEDA, IFOAM–Organics Asia, bad ka jingïarap jong ka NERAMAC, bad kane ka prokram ka la wanrah lang ïa ki nongthied na kiwei kiwei ki ri, ki nongshalan mar nabar ri, ki riewshemphang ha ki kam organic, bad ki kynhun jong ki samla na ki ri bapher bapher.
Ha kane ka sngi nyngkong la wan ïashim bynta lang da ki kynrem ki lyndan ba kynthup ïa u Satinder Kumar Bhalla, Secretary, North Eastern Council, Dr. Vijay Kumar D, Commissioner & Secretary, Sorkar Meghalaya; Abhishek Dev, Chairman, APEDA; Dr. Shakil P. Ahammed, Chief Secretary, Sorkar Meghalaya; Saloni Verma, Deputy Secretary Sorkar Meghalaya, Brenden Hoare, Adviser, IFOAM Jennifer Chang, Executive Director, IFOAM Asia; Bhaskar Barua, Managing Director NERAMAC, Dr. Saswati Bose, General Manager APEDA, Mathew John, President, IFOAM Asia; bad ka Priyanka Uday, Associate Director, CRISIL.
Ha ka jingkren ha kane ka sngi, u Abhishek Dev, Chairman, APEDA, u la kdew sha ka jingdonkam ban pynkhlain ka jingpaw ki mar rep organic jong ka thain shatei lammihngi ha kylleng ka pyrthei. U la ong, “Ka bynta kaba nyngkong jong ka Northeast India Organic Meet ka la wanrah lang ïa kito kiba don bynta ha kane ka kam na 22 tylli ki ri, kaba pyni ïa ka jingpeit kiwei kiwei ki ri ïa ki lad kiba don ha ki mar organic jong ka thain. Ngi la ïatreilang bad ka Sorkar Jylla, ka Tnad Kam Rep jong ka Sorkar Pdeng, NEC bad IFOAM Asia, da ka jingthmu ban kyntiew shuh shuh ïa ka jingpaw ki mar organic jong ka Meghalaya.”
U la ong shuh shuh, “Katba ngi dang ïaid shakhmat, ngi thmu ban pynlong ïa kane ka prokram man u snem, ban pynlong da ki jylla bapher bapher jong ka thain shatei lammihngi man u snem ban kyntiew ïa ka kam pynpoi mar organic sha kylleng ka pyrthei. Ngi pynshlur ruh ïa ki nongrep, ki FPO bad kito kiba don bynta ha kane ka kam na Meghalaya ba kin wan ïashim bynta ha ka BIOFACH ka ban long, ha kaba ka India ka dei ka ri ba ïatrei lang, ban pyni shuh shuh ïa ki mar jong ki sha ka pyrthei.”
Kane ka prokram ka thmu ban pynkhlain ïa ki jingïasoh bad ki iew na ka bynta ki mar organic jong ka thain shatei lammihngi ha kylleng ka pyrthei, kyntiew ïa ka rukom rep kaba ïaineh bad kaba khyllie im biang, bad wanrah ïa ka jinglong nongïalam ki samla lyngba ki jingïamir jingmut bad ki jingïatreilang hapdeng ki ri.
Lyngba ki bynta B2B, ki prokram ban pyni ïa ka kolshor, ki jingleit sha ki jaka bapher bapher, kane ka prokram ka long kum u mawmer ha ka jingpyni ïa ki lad organic jong ka Meghalaya bad ka thain shatei lammihngi.