Shillong, Naitung 5 : Ka kyrtong President jongka National Democratic Alliance (NDA) ka Draupadi Murmu kan wan ïa kynduh ïa ki MLA bad MP jongka jylla ha Orchid Lake Resort,Umiam lashai ka Sngi Balang 6 tarik.
Ha kane ka jingïakynduh kan sa ai jingkren ruh sha baroh ki MLA bad MP.
Haba ïathuh ïa kane u National Executive Member ka BJP uba dei peit ïa kane ka election President u bah A.L Hek u la kyntu ïa baroh ki MLA bad MP ka jylla ban ïa wan khnang khnang sha kane ka jingïakynduh ban ai jingkyrshan ïa ka Murmu kumba ka long ka kyrtong President ba nyngkong eh napdeng ki jaidbynriew riewlum.
U bah Hek uba dei ruh u myntri ba mynshwa ka sorkar MDA u la ong ba ka NDA barobor ka dei ka party kaba ïeng ha ka nongrim ban pynkhlaiñ bor ïa ki kynthei bad dei na kane ka daw ka sa jied ruh da ka longkmie na ki riewlum ban ïakhun ïa katei ka shuki.
Ka NDA da kawei ka jingmut ka la rai ban pynïakhun ïa ka Murmu kaba dei ruh mynshwa ka Lat jongka Jharkhand.
“ Kan long ka jingsarong ïa ki jaidbynriew riewlum ba ka Murmu kan long ka riewlum ba nyngkong eh ban ïoh kiew ha katei ka shuki ba hakhlieh duh jongka ri” ong u bah Hek.
