Bym seisoh ka jingïakren bad u Mission Director, yn ïakhih khlem buh por ki nongtrei ka NHM

Shillong, Naitung 05: Ki nongtrei jong ka National Health Mission (NHM) Meghalaya, kiba ju trei kum ki Service Delivery Staff (SDS) ha ka 05 tarik u Naitung ki la rai ban sdang da ka jingïakhih jong ki naduh ka 6 tarik Naitung hadien ba ba ka jingïakren jong ki bad u Mission Director ka NHM kam shym la seisoh eiei kumba ki dawa, kine ki nongtrei ki la rai ban sahngeh ïa ka jingtreikam ha baroh kawei ka jylla haduh ba ka sorkar kan sngap ïa ka jingdawa jong ki.
Kine ki nongtrei SDS ki la pynlong ïa ka jingïakhih ha ka 5 tarik Naitung da kaba ïaid paidbah na Madan Malki sha ophis jong ka Directorate of Health Service (DHS) Laitumkhrah ban dawa na ka sorkar ban peit biang ïa ka final draft jong ka Rationalisation ïa ki nongtrei namar ka don pynban ka jingkhate ïa ka tulop ki nongtrei kat kum kane ka jingpynbeit thymmai.
Haba ïakren bad ki lad pathai khubor u Bah Kordorlang Lyngdoh uba dei uwei na ki nongmihkhmat jong ka SDS u la ïathuh ba ki nongtrei jong ka NHM ki dawa ba ka sorkar kan pynbeit biang ïa ka rationalization jong ki nongtrei hadien ba la don ka jingot na ka tulop ka jong ki.
Shuh shuh la ïathuh ruh ba kane ka final draft kam pynhun satia ïa ki nongtrei bad u la ong ba na ka liang jong ki ki dawa ïa u Mission Director ka NHM, Meghalaya ba un peit bad pynbeit thymmai ïa ki kyndon ha kane ka final draft.
“Mynta, ka SDS jong ka NHM Meghalaya kaba don ym duna ïa ka 2000 ngut ki nongtrei kiba la pyrshah ïa ka unregulated rationalization jong ki nongtrei ha kylleng ka jylla” ong u Bah Kordorlang.