Shillong, Naitung, 05: Ki nonghikai SSA ha ka jylla hapoh ka shatri jong ka Meghalaya Sarva Shiksha Abhiyan School Association (MSSASA) ha ka sngi Baar ki la leit ban ïakynduh ïa u Myntri ka tnad Pule Puthi ka Sorkar Jylla u Bah Lahkmen Rymbui ban dawa ïa ka Sorkar ban pynlait noh ïa ka tulop kaba la sahkut la san bnai kyntthih.
Nalor kaba dawa ban pyllait ïa ka tulop, ki nongïalam jong ka MSSASA ki la dawa ïa ka Sorkar ba kan pynkiew noh ïa ka tulop jong ki nonghikai Samagra Shiksha Abhiyan (SSA) bad ai jingmut ruh da kaba mang kham bun ka pisa na ka bynta ki skul SSA ha Meghalaya.
Ha ka jingïaken bad lad pathai khubor u President jong ka MSSASA u Bah Aristotle Rymbai u la ïathuh ba ki nonghikai SSA ha ka jylla kim shym la ïoh shuh ïa ka tulop jong ki naduh u bnai Rymphang haduh u bnai Jylliew mynta u snem bad ki la dawa ïa ka Sorkar ban pynlait noh ïa ka tulop jong ki na bynta u bnai Rymphang bad Lber la kumno kumno ha shuwa ka 15 tarik mynta u bnai bad lada ka Sorkar ka dang ïai pynslem ki nonghikai skul SSA kim banse ban mih sha surok ban pynbor ïa ka Sorkar ba kan pynlait noh ïa ka tulop jong ki.
“Na ka liang jong u Myntri ka tnat Pule Puthi u la ïathuh ba ka jingbym lah ban siew ïa ka tulop ka dei namarba ka Sorkar Jylla kam pat pyllait ïa ka pisa kaba kot kumba T. 44.36 klur bad ka jingpynlait slem jong ka Sorkar Pdeng ïa ka pisa sha ka Sorkar Meghalaya ka la ktah bha ïa ki nonghikai SSA,’ ong u Bah Aristotle.
U la ïathuh ruh ba Myntri ka tnat Pule Puthi u la kular ba ka Sorkar kan siew noh ïa ka tulop ki nonghikai na bynta u bnai Ïaiong, Jymmang bad Jylliew tang shu ïoh ïa ka pisa na ka Sorkar India lyngba ka Ad-hoc Instalment bad ka First installment.
Shuh shuh u la ïathuh ruh u Bah Rymbui u la ïathuh ba shen kan don ka jingïalang bad u Myntri Rangbah ka jylla u Conrad Sangma ha kaba yn sa rah ïa ka mat ban kyntiew noh ïa ka tulop ki nonghikai SSA bad halor ka jingdawa ba ka Sorkar kan thungkam pura noh ïa ki nonghikai skul SSA kum ki nonghikai skul Sorkar.
U Bah Aristotle u la ïathuh ruh ha ka dorkhas ba la aiti ha u Myntri ka tnat Pule Puthi ba MSSASA ka la ai jingmut ïa ka Sorkar Jylla ban mang kham bun ka pisa na bynta ki skul SSA ha ka jylla katkum ki kyndon jong ka Right to Education lyngba ka Section 7(5).
