Shillong, Naiwieng 28: U Myntri ka sorkar jylla uba khmih ïa ka tnat Community and Rural Development (C&RD) u Bah Sosthenes Sohtun u la banjur ïa ka jingdonkam ban pynbha ïa ka kam shakri ïa ki paidbah khamtam eh na ka bynta jong ki 56 ki block development offices (BDOs) ba kin lah ban pyntreikam bha ïa kiba bun ki skhim ha ki thaiñ nongkyndong.
“Ngi la ïasyllok ïa kiba bun ki mat bad kumjuh ruh ban kyntiew ïa ki kam pynroi sha ki paidbah lyngba ki ophis block development khamtam ha ki thaiñ nongkyndong,” ong u Bah Sohtun hadien ba la pynlong ïa ka jingïalang bishar kam bad ki heh ophisar ha ka sngi Thohdieng.
Ha kane ka jingïalang la wan ban ïashim bynta da director, joint director, project director, bad ki BDO na ki 56 tylli ki block, da ka jingthmu ban pyntreikam bha ïa ki skhim ha ki thaiñ nongkyndong.
“Ka jingbym biang ka lynti ïaid bad ka jingbym don ki mobile tower ka la wanrah ka jingeh ïa ki village employment council bad ki self-help group,” ong u Bah Sohtun da kaba bthah ïa ki BDO ba kin pynbeit ïa kane ka jingeh.
“Ka sorkar jylla ka la shim khia ban wanrah ïa ki kam hakhmat jong ki paidbah bad ngi kwah ruh ban kyntiew ïa ki kam shakri na ka bynta ki paidbah da kaba pyntreikam bha ïa ki skhim jong ki paidbah,” u la bynrap.
