Ngi donkam ban ai ki jinghkai ïa ki nonghikai kaba long katkum ka juk mynta: Lahkmen

Shillong, Naiwieng 27: U Myntri ka tnat Pule puthi jong ka sorkar jylla u Bah Lahkmen Rymbui ha ka sngi Palei u la plie ïa ka course kaba 6 bnai jong ki nonghikai kiba khlem shah hikai kiba dei na ka pre-primary haduh ka class II bad la banjur halor ka jingdonkam ban ai ki jinghikai ba dei ban ïaid lang katkum ka juk kaba mynta ha kaba ïadei bad ka kam pule puthi.
“Ngim da donkam tang ïa ka jingnang jingtip ne ka qualification, hynrei ngi donkam ruh ïa ka jingai jinghikai. Ka pule puthi mynta ka long kaba donkam bha bad ngi donkam ïa ka jingkylla,” ong u Bah Rymbui haba kren ha ka programme DERT, Nongrimmaw, Laitumkhrah.
Na ka liang jong u Bah Rymbui u la pynpaw ïa ka kam kaba kongsan ba la shim da ka DERT kum ka state nodal agency na ka bynta ban hikai ïa ki nonghikai kaba ïaid lang bad ka rai jong ka Supreme Court ha ka 1 tarik u Nailar 2025 kaba la shim ha ka jingïalang jong ka TET.
U la kdew ba ha ryngkat bad ka TET, ki nonghikai ki dei ruh ban ïoh ki jinghikai kiba biang. “Ha kine ki 2 snem, lada ka Supreme Court ka khlem bishar biang ne ban pynbha ïa ka rai, ka ka dei ban wan ïa ki lad ki lynti ban ai ka jingkyrshan ïa ki nonghikai kiba don ha ki kam. Ka bynta jong ka tnat Pule puthi bad ka DERT ka long kaba kongsan,” u la bynrap.
Na ka liang jong u Myntri u la ong ba ka jingpyllait ïa kane ka course ka long kaba kongsan na ka bynta ka jylla naba ïa kane ka jingai jinghikai la wanrah ha kine ki bnai ba la dep.
U Myntri u la pynpaw ruh ka jingai khublei ïa ka kynhun Myntri ba ka la mynjur ïa ka Meghalaya Teachers Training Academy, kaba ban ïaid lang bad ki jingtreikam kaba jan bad ka DERT.
U Bah Rymbui u la pynpaw ïa ka jingdonkam ban update, ïa ki subjek, ki rukom hikai kiba ïaid katkum kane ka juk kaba mynta.
U la ong, “Ka AI ka dei ka lynti ban ïaid shakhmat. La ngi pdiang ne em ngi dei ban buh lang ïa ka AI ha ka curriculum.”
Haba banjur ïa ki jingduna ki kam jingtei u Myntri u la ong u la ba ka DERT ka long ka lynti kaba donkam ban pynrung ïa ka AI na ka bynta ka Class III shakhmat.
Shuh shuh na ka liang jong u, ula ong ba u Myntri Rangbah bad kum u Myntri ka tnat Pule puthi ki la shim khia ha kaba ïadei ban kyntiew ïa ka tnat pule puthi, da kaba pynthikna ba ki skul kin dei ban ïoh ki nonghikai kiba biang bad katkum ka jingdonkam jong ki.
Ha kane ka prokram la wan ban shim bynta da u Director ka DERT R. S. Manners, Special Guest R. Rapthap, ki heh ophisar na ka tnat bad kiwei kiba la shah khot sngewbha.