Shillong, Naitung :Ka Executive Committee ka Dorbar Shnong Jaiaw Laitdom, Shillong ka ba la long ha ka 4 tarik mynta u bnai ka la ïakren khia halor ka jinglong jingman jong ka dong Jaiaw ha kine ki sngi ka ba la ktah jur ïa ka jingsngew jong ki nongshong shnong namar ka jingshah shoh shah dat jong kiwei pat ki jaidbynriew ha ki riew shim kabu ki bym don shuh ka mynsiem tipbriew tipblei.
Ka Dorbar ka la pynpaw ba kane ka jingleh riewkhlaw ka jong ki ka la pynjah burom shisha ïa ka shnong ka thaw, ïa ka jylla bad ïa ka jaidbynriew hi baroh kawei.Kumta na ka liang ka EC ka DS Jaiaw Laitdom ka da pynrem jur halor ka jingshah shoh ki nongtrei bylla ki ba na kawei pat ka jaidbynriew ka ba la jia ha ka 29 tarik u Jylliew ba la dep ha Jaiaw Umpohliew, ka ba khlem don shuh ka mynsiem jingisynei bad halor kiwei pat ruh ki jingjia ki ba ktah matïong ïa ka dorbar shnong bad kumjuh ruh halor ka jingshah ktah kti jong ki samla pule ki ba dei na Kerala.
Na ka liang ka Dorbar Shnong ha u kyrwoh lyngba u Bah HS Suting, General Secretary
ka kyrpad jur ïa ki bor jong ka aiñ ba ki dei ban kem mardor ïa ki briew ki ba donkti bad ban leh da ka ba tyngeh khnang ba kum kine ki jingjia kin ym jia shuh hadien habud.
Shuh shuh na ka bynta ban rat dyngkhong ïa ki jingsniew ki ba harukom, ka dorbar shnong Jaiaw Laitdom ka pynpaw ba ka long ka ba kloi ban ïatreilang bad ki bor jong ka aiñ bad ruh bad kiwei kiwei pat ki dorbar shnong ha kano kano ka por ba donkam namar ka DS Jaiaw Laitdom ka long ka dorbar ka ba kwah barabor ïa ka shongsuk shongsaiñ, ka jingshngaiñ jong ki nongleit nongwan hapoh shnong hapoh thaw bad ha ka jylla hi baroh kawei.
Ha kajuh ka por ka DS ka kyntu ruh ïa ki samla baroh ban ïatreilang bad ka dorbar shnong khnang ban wanrah ïa ka shongsuk shongshngaiñ hapoh shnong poh thaw.
