Nongstoiñ, Naiwieng, 23: Ka Ophis jong ka Dairy Officer Nongstoiñ, ha ka taiew ba la lah ka la rakhe ïa ka National Milk Day 2025 ha Bishop Hall Nongstoiñ na ka bynta ban kynmaw burom ïa u Kpa ka White Revolution u Dr.Verghese Kurien.
Ha kane ka sngi la sakhi ïa ka jingdon rygkat jong u Bah C.P Mawkon MCS ADC West Khasi Hills, District kum u kongsan, ha ryngkat kiwei pat ki Ophisar ka tnat Dairy bad A.H & Veterinary Nongstoiñ, kynthup ïa u Dr J.Kongwang, Kong B.Phawa Senior Dairy Officer, Kong D.L Mawlong, Dairy Officer Nongstoiñ, ryngkat ki dkhot jong ka Dairy Cooperative Society West Khasi Hills District, ki khynnah skul na ki skul kiba pher ka Nongstoiñ bad kiwei kiwei.
Haba kren kum u kongsan ha kane ka jingïalang, u Bah C.P Mawkon, u la ong ba ka rakhe kyrpang ïa kane ka sngi, ka dei namar ba ka don ka khana pateng halor ki kam radbah kiba u Dr. Verghese Kurien u la leh, na ka bynta ban pynlong ïa ka Ri India kaba dap kyrhai ha ka jingdon jong ka dud bad kiwei pat ki jingmih kiba ïoh na ka masi.
Lyngba jong u la ïoh ban sdang ïa ka Cooperative Movement kaba pynkup bor ïa ki nongri masi bad ki nongpynmih dud ba kin pynïaid bad buh dor ïa ka dud ka jong ki, khlem ka jingshah khniot dor ha ki nongkhaïi.
U la sdang ruh ïa ka Kaira District Cooperative Milk Producers Union Ltd (Amul) bud sa da ka Operation Flood ka dairy development programme kaba heh duh ha u Kyllalyngkot 1970. Lyngba jong kane ka la pynlong ïa ka Ri India ka Ri kaba heh tam hapoh Pyrthei ban pynmih duh ha u snem 1988 bad ka dang neh haduh mynta.
Na ka liang u kongsan, u la ai mynsiem shuh shuh ïa ki nongri Masi ka West Khasi Hills, ba lada ki don ka mon, ka district ka don ïa ki lum jyrngam kiba bun kiba lah ban ri Masi. Ki dei ban shim ïa ki sien jam khnang ba kin ïoh ban pynmih shibun ka dud ban pynïaid iew hapoh District bad wat shabar ruh.
Ki jingeh haba sdang ïa kano kano ka kam kin don beit, pynban lada don ïa ka mon kaba jwat lah beit ban kynjoh sha ka thong bad kin long ruh ki nongai kam dalade ïalade khlem da shaniah ha kiwei.
Ha ka jingrakhe, Ophis Dairy ka la ïoh ruh ban sam ïa ki khusnam sha ki nongjop jong ka Painting, Creative Arts, Signage, Photography halor ki phang kiba pher kiba ïadei bad kane ka sngi.
La sam ruh ïa ka Khusnam Best Diary Cooperative Society u snem 2024-2025 sha ka Ïatreilang Dairy Cooperative Society, Best Progressive Dairy Farmer u snem 2024- 2025 sha u Bah Alfred Kynshi. La ïoh ruh ban sam ei ïa ka dud sha baroh kiba wan sha kane ka prokram.
