K a jingjia kaba sngew kyndit jur ha kine ki sngi, ka long ba haba thut ka leit ka wan ki trok kit dewbilat, baroh baroh ki ïa kulmar khlieh bad kitei ki kynthup naduh ki arngut ki Symbud Myntri Rangbah, sa ki Deputy Commissioner bad sa ki pulit lei nai ïakren shuh bad kane ka pyn pyrkhat, ba haduh katno ka bor jong kine ki karkhana dewbilat, ba ki lah ban pyn kulmar khlieh haduh katne ïa ka sorkar baroh kawei, haba ka jingshalan dew bilat kaba bun bah jong ki ruh kam dei satia ha kane ka jylla, hynrei ka dei sha Assam, West Bengal bad ter ter.
Kane ka jingjia ka wanrah ïa ka jingpyrkhat kaba kham jngai bad kata ka long ba haba shah khang ki trok kit dewbilat, ki ïa bud da ki pulit ban synran bad ka sorkar baroh kawei ka kulmar jingmut, katba haba u nongbishar, uba la thung da ka Supreme Court, ban tohkit halor ka jingjah dewïong bad ka jingshna beaiñ ïa ki karkhana Coke bad haba u ai ma u, da ka jingthoh bad ka jingujor shaphang ka jingjah dewïong, ka jingplie beaiñ ïa ki karkhana Coke, ym ïohi, ba tang uwei u Myntri sorkar ruh ba un pynmih ïa ka kyrwoh kaba u shim khia halor kane ka jingbthah jong u nongbishar lane ban pynmih ïa ki pulit sha surok, ba kin khynra ïa ki trok kiba kit dewïong beaiñ ne ban kem ïa kitei ki riew bymman.
Kane kajuh ka jingjia, ka la jia ruh kham mynshwa ha ki snem 21-2022, ha kaba ki trok ki la kylla lyndang kylla pyllup bad ki la ïeng da ki laiñ kiba jrong ter ter ha ki surok bah jong ka ri Khasi Jaiñtia ban kit dewïong, ha kaba ka la mih ka jingujor kaba jur na ki paidbah bad ki sengbhalang, hynrei ha katei ka por ruh, la ïohsngew ïa ka jingkren jong ki heh sorkar MDA, kiba ong ban leit ujor sha ki thanat pulit bad katei ka dei namar ba ka jingujor pleng ka dei na ki paidbah bad kam dei na ki heh jong ki karkhana dewbilat.
Kumta ka jingkylli, kaba ha khmat duh, ka long ba balei sha, ka pynlamwir haduh katne katne ïa ka sorkar MDA baroh kawei, haba ki trok dewbilat ki shah khang lynti bad haba ki karkhana dewbilat ki dei ruh kiba la pynïaid da ki riew shimet bad kim don jingïadei eiei bad ka sorkar jylla, namar ba ka GST ruh ki siew sha ka sorkar India.
Kane ka mat ka pynpyrkhat jngai ïa ki pyrman saiñ pyrthei, namar ba lada ka jingkhang lynti ïa ki trok dewbilat, ka pynpait dohnud ïa ki heh sorkar, kumno pat ïa ka jingkhang lynti ïa ki trok ban khaïi sha Bangladesh, ka jingtuh pylleiñ pylleiñ ïa u dewïong na ki par ba la pynlang, ka jingshna beaiñ ïa ki karkhana coke bad nangta ruh haba kat ïa ka jingot kba kaba jia ha ka shnong Lapangap, ha ka Constituency jong u Symbud Myntri Rangbah ka jylla.
Ha kaba kum katei ka jyrwit jyrwat, ka jingpynkut kan shu long noh, kumba ong ka jingrwai “Ban kynmaw ngam kwah, ban klet ruh ngam lah, imat ka don ka daw”.
Kumta lei ba wan ka tamasa Cherry blossom katno ka Sorkar ka pynlut ha ki tamasa ha Shillong bad pynklet ïa ki samla ka jaitbynriew na ki jingjia ha Lapangap bad kumjuh ruh ki jingjia shah lehbor ki Khasi ha thaiñ Ri Bhoi District.
Tang ki nongrwai kiba wan pynbyrngia ha ka Cherry blossom ngim lah shuh ban tip haduh katno ka Sorkar ka siew ïa uwei ne kawei ka nongrwai nongtem, katba dang bun bah ki nongshong shnong ka jylla kiba im ha ka jingduk, jynjar ki ïoh jingsumar haba ki pang shitom, ki nongrep kiba mad jingeh, nangta sa kiwei kiwei pat kiba ngim lah ñiew, ka shong satang ki paidbah ban bishar, namar ka Meghalaya kam pat dei kum kiwei ki jylla kiba la kiew nadong hadong kiba ym ju ïohsngew ba kin pynlong ïa kine ki tamasa pynlut kai pisa.
