Shillong, Naitung 4 : Ka kynhun Shillong Chamber Choir kan sa pyllait paidbah ïa ka jingrwai thymmai kaba dei ruh ka jingpynmih kaba kongsan, ka jingrwai kaba la thaw da i (L) Bah Neil Nongkynrih ka ba kyrteng “The Great Indian Train Journey.” Ka video jong katei ka jingrwai kan sa don ha ka Youtube channel jong ka kynhun SCC ha ka sngi saitjaiñ, 9 tarik u Naitung ha ka por 2 baje mysngi. `Kane ka sngi ka dei ruh ka sngikha jong i (L) Bah Neil Nongkynrih. Ka SCC ka la pyntip ruh ba i Bah Neil in sa paw ha kane ka video kaba dei ka jingïashim bynta kaba khatduh jong i. Kane ka jingrwai ka dei ka jingïathuh khana shaphang ka Indian Train Journey ha ka sur jingrwai. Ka jingthrang jong i Bah Neil ka dei tang ban wanrah jingkmen bad jingshongshit ïa u paid baroh lyngba kane ka jingrwai kaba bun rong.
