Ngi shakri hok ïa ki paidbah lah ngiah ban jubab ïa ki jingkynnoh bym don nongrim : CM

Shillong, Naitung 4 : U Myntri Rangbah u Conrad K Sangma u la ong ba ka sorkar MDA hapoh ka jingïalam jongka NPP ka pyrshang ban ai ka jingshakri hok ïa ki paidbah namar ka thong jongka ka long ban wanrah ïa ka roi ka par kumta ym don por ban ïa pynphai nia ne pynshai na ka por sha ka por ïa ki jingkynnoh ba khlem nongrim.
U la ong ïa kane da kaba kyntait ban jubab halor ki jingkynnoh u General Secretary ka AITC u Abhishek Banerjee ba ka NPP ka synshar arsap ha ka jylla.
“ Kam don jingmyntoi ban ïabun ktien namar ha ka ri synshar paidbah uno uno ne kano kano ki lah ban kynthoh laiphew jait ha la ka mon jongki. Kumta ngam sngew don jingmyntoi ban ïa bun nia bad ki namar ka thong ka long ban trei bad shakri hok ïaki paidbah kumta ngam kwah ban kynthoh halor ka jingkren utei u General Secretary ka AITC” ong u Myntri Rangbah.
“ Ngam donkam ei ei ban kynthoh namar nga don bun kiwei ki kam ban leh bad ngi trei ban pyndep lut ïa baroh ki jingkular hakhmat ki paidbah kata kaba kongsan tam ïa ngi. Ngi synshar ïa ka jylla bad don bun ki kam ban pyndep kumta ngam don por ban ïa kynthoh ne ïa pynshai ïa kaei kaba ki kwah ïakren ai kin ïakren hynrei ngin ïaid beit shakhmat ban trei la ka kam” ong biang u Conrad.