Shillong, Naitung 04 : Ka kynhun Myntri ha ka sngi Nyngkong ka la mynjur ban pynkylla noh ïa ki kyndon jong ka Meghalaya Professions, Trades, Callings And Employments Taxation Act, 1947 kaba thmu ban pynngat kyndon ïa kito ki briew ki bym siew ïa ka khajna.
Haba pyntip ïa katei ka rai hadien ka jingïalang jong ka kynhun Myntri, u Myntri Rangbah u la pyntip ha ki lad pathai khubor ba katkum katei ka kyndon, donkam ka jinglum jingkhein haba ïadei bad ka jingdon kiba siew ïa ki professional tax bad kane ka long katkum ka jaka.
Katkum ka jingong jong u, kin don ki jaka ban peit da ki district council bad kin don pat kiban peit da ka taxation department.
U la ïathuh ruh ba la rai ba kino kino kiba kamai hapoh 1.8 lak tyngka shisnem kim donkam satia ban siew ïa katei ka khajna. “Mynshwa ki paidbah kiba kamai 50,000 shajrong bad shapoh kim donkam ban siew khajna hynrei mynta pat ngi la kyntiew sha ka 1.8 lak tyngka,” u la ong.
Nalorkata, u Conrad u ong ruh ba katei ka jingpynkylla ka plie lad ruh ban pynhiar ïa ki kyndon na ka 12 sha ka saw tylli. Kata kin don tang kiba 1.8 lak haduh 3lak kaban long 500 tyngka, nangta kiba 3 lak – 5 lak kaban long 1000 tyngka, 5lak haduh 7.5 lak tyngka kaban long 1,500 tyngka bad kiba palat 7.5lak tyngka pat kan long 2,500 tyngka.
