Shillong, Naitung 04 : Ka sorkar jylla ha ka sngi Nyngkong ka la pynbna ba kin tei noh ïa ka National Law University ha ka jinglut kaba kot sha ka 6.5 klur tyngka. Ïa katei ka rai, la shim hadien ba ka kynhun Myntri ka la mynjur ïa ka National Law University Ordinance 2022.
Katkum ka jingïathuh da u Myntri Rangbah ka Jylla, Conrad K Sangma hadien ba la wai ka jingïalang, la ong ba ïa katei ka Ordinance mynta kin rah sha Ïing Dorbar Thawaiñ ka jylla ban ïoh ïa ka jingmynjur.
Shuh shuh u la pyntip ruh ba katei ka skul bah kan treikam shwa na ka temporary campus katba kim pat ïoh da kaba pura. U Conrad u ong ruh ba kin don haduh 60 ngut ki samla pule kiban ïoh ban rung leit pule ha katei ka skulbah man u snem.
U Myntri Rangbah u la ong ruh ba ka jingpynlut kaba man u snem kan poi beit 6.5 klur tyngka kata ruh katkum ka jingdonkam kaba lah ban ïapher na uwei u snem sha uwei pat.
Ha kane ka sngi, ka kynhun Myntri ka la mynjur ruh ïa ka thup jong ki kam ba lait na ka bynta ka model degree college ha Rongjeng, East Garo Hills.
