Nongstoiñ, Naiwieng 12 : Ka Mawduh Deficit Upper Primary School kaba dei kawei na ki skul ha ka thaiñ Nongkhnum West Khasi Hills District, da ka jingthmu ban kyntu ïa ki sap ki phong ki khynnah ha ka put ka tem, ha ka sngi hat majai ka la ïoh ban plie ïa ka Music Class ha katei ka skul.
Katei ka skul ka la shim ïa katei ka rai ban plie ïa katei ka Music Class, ka long hadien ba ka la ïohi ïa ka nuksa na u babu Shemphang Khardewsaw, u ba dei uwei na ki nonghikai skul u ba lah pawnam bha ha ka put ka tem ha ka thaiñ West Khasi Hills District u ba ju mlien ban hikai jingrwai ïa ki khynnah skul Byrki.
Nalor katei ka jingplie ïa ka Music Class, ka skul ka la rakhe ruh ïa ka Children’s day ha kane ka 11 tarik u Naiwieng kaba hap ruh ka tarik sngi kha u Pandit Jawaharlal Nehru u President ba nyngkong eh ka Ri India. La ong ba la rakhe noh ha katei ka tarik namar ha ka 13 tarik kaba dei hok ka Children’s day, la ïatyngkhuh noh bad ka jingsdang ki examination jong ka skul.
Ha katei ka sngi u babu Shemphang u la long kum u kongsan jong katei ka jingïalang bad kum ka dak jong ka jingplie ïa ka Music Class, u la ïoh ban khap ruh ïa u ribbon bad ki khynnah skul ki la ot ruh ïa u Cake kum ka dak jong ka jingrakhe lehkmen kyrpang ïa ka Children’s day.
Hadien katei ka jingïalang kaba lyngkot, ka skul ka la pynlong ruh ïa ki program bapher bapher kynthup naduh ki jingshad, jingrwai, jingkyntip bad kiwei kiwei bad la pynïaid ïa katei ka jingïalang da I miss Pdianghun K Sohphoh Headmistress ka Mawduh Deficit Upper Primary School, ha ka jingïadonlang ruh u Babu O. Sangriang bad u babu Pressman Ïawren u ban dei u nonghikai ïa ka put ka tem ïa ki khynnah ha katei ka shlem.
U babu Shemphang Khardewsaw haba kren kum u kongsan, u la ong ba ka put ka tem ka dei kawei na ki mat kaba ki khynnah ki dei ban nang. Ka dei ruh ka Ktien Pyrthei ha kaba baroh ki briew kiba sngap hynrei kim sngewthuh ïa ki kyntien pynban ki sngew tynnad pat ïa ki jingtem.
Katba u babu O. Sangriang u la ong ba ka put ka tem ka lah dei kawei na ki lad kaba pynmyntoi ïa ki khynnah na ka bynta ka lawei. Ka sorkar ka lah dei ban phai khmat bha ha ka put ka tem ban pynrung ha ki skul bapher bapher, ne ban ai mynsiem ha ka put ka tem khnang ba kan nang rah ïa ki khynnah ha ka sap ka phong sha kawei ka rynsan kaba pynmyntoi.
