Nongstoiñ, Naiwieng 06: Ka sur ki Nongwest ka pynrem jur ïa ka jingleh jong ki bor pulit pyrshah ïa ki dkhot jong ka Meghalaya Commercial Truck Owners Driver Association (MCTODA). Na ka liang ka sur ki Nongwest, ka la pynrem da kaba ong ba ka dei ka jingleh riew khlaw jong ki pulit pyrshah ïa ki dkhot kiba pynlong ka jingïakhih kaba jai jai.
“Kum ki samla jong ka West Khasi Hills District hapoh ha shatri jong ka sur ki nongwest, ka pynrem jur ïa ka jingleh jong ki pulit pyrshah ïa ki dkhot jong ka MCTODA. Kane ka jingleh donbor pyrshah ïa ka jingïakhih ba jai jai, ka long pyrshah ïa ka riti shynshar paidbah”, ong ki nongïalam jong ka sur Nongwest.
“Ki pulit ki dei ha ka jingshisha ban peit ïa ka bha ka miat ban pynïaid beit ïaid ryntih ïa ki aiñ ki kanun, hynrei balei pat ki kylla long kum ki nongthaw jingklumar bad kynnoh lane pharep bad kem ïa ki nongïakhih. Kane ka paw pylleiñ ba ka dei tang ka buit poh ban pynpjah jubor ïa ka jingïakhih”.
“Kum ka sur ki nongwest ngi dawa ïa ka sorkar ba ka dei ban tuklar wut wut ban ban ai noh ïa ka jingdawa jong ka MCTODA, namar ka long kaba shongnia kata lada kata ka sorkar ka dei hok ka sorkar jong ki paidbah nongshong shnong ka jylla Meghalaya”.
“Kumno ngin ieng ha la ki jong ki kjat lada ka sorkar kaba dei ban peit lem pat ka khñiot pynban ïa ka bylla ka sngi jong ki paidbah. Ka sur ki nongwest ka pynrem jur ïa ki trai karkhana dewbilat, kiba la nud ban leh trai khlieh khlem da burom shuh ïa ki trai ri trai muluk”.
“Lyngba ka jingleh jong kine, ka pynkyndit bynriew ïa ngi ki trai ri ba kumno kan jia ka long dien ka pateng ka jong ng,i lada ngin ai lad ïa kum kine ki nongwei shi sngi ban wan kamai hapoh u pud u sam jong ka ri Khasi jong ngi”.
“Baroh ki nongshong shnong jong ka jylla ki kwah ïa ka shong suk shong saiñ hapoh ka jylla Meghalaya. Hynrei ban leh ïa kata kam dei pat ban shu set jubor da u kak ïa ka shyntur jong ki nongïakhih kiba ïakhih da ka lynti kaba jai jai katkum ka riti synshar jong ka ri”, ong ka kyrwoh khubor.
