1618 ngut ki samla pule pynkup burom ka skulbah USTM, ïoh u Jeremaiah Warbah ïa ka Chancellors Gold Medal Award

Nongpoh, Naiwieng 03: Ka skulbah University of Science and Technology Meghalaya kumba ju leh man u snem mynta ka sngi kala pynkup burom ïa kumba 1618 ngut ki samla pule kiba la pyndep ïaki pule haki kyrdan bapher bapher haka 11th Convocation bala pynlong ha Central Auditorium jong katei ka skulbah.
Napdeng kitei ki 1618 ngut ki samla pule kiba la pyndep iaki jingpule haki kyrdan bapher bapher, 762 ngut ki dei ki Undergraduates, 824 ngut ki Post Graduates bad 32 ngur ki PhD Scholars bad kaba kham sngew sarong ka long ba u Jeremaiah Warbah naka jylla Meghalaya u ba pule ïaka BA Administrations & Governance u la ioh ban khur ïaka Chancellors Gold Medal Award halor ka jinglah jong u ban pule bad lehbha bad wan shakhmat napdeng baroh ki samla ba pule haka kyrdan Under Graduate.
Ha kane ka sngi u Bah Sniawbhalang Dhar Symbud Myntri Rangbah ka jylla u la shim bynta kum u kongsan, haka jingdonlang u Dr. Kris Gopalakrishnan, Chairman, Governing Council, Indian Institute of Science Bangalore, u M Hoque Chancellor ka skulbah, ki khraw pyrkhat na kylleng ka ri India, ki nonghikai ki samla pule lem bad ki kmie ki kpa jong ki samla pule.
Haba kren ha kane ka sngi, naka liang u Bah Sniawbhalang Dhar kum uwei naki nongïalam haka jylla u la ai khublei ïa baroh ki samla pule kiba pyndep ïaki kyrdan bapher bapher na katei ka skulbah kaba dei kawei naki skulbah shimet kaba paw haka thaiñ Shatei Lam Mihngi bad wat haka ri baroh kawei bad kane ka dei ka lynti ïa ki ba kin jam pat sha kiwei kiwei ki mawjam haka jingim jong ki.
U la ong ruh ba haka skulbah ki don bun jait ki samla, ki don kiba wan shakhmat bad ki don ruh kiba duna haka jingpule hynrei kata kam mut ba ki samla kin duh mynsiem ne kin kynran dien noph namar man u briew u don laka jong ka bynta kaba u Blei u la mang da kaba ai nuksa ruh ba kum uwei naki myntri haka sorkar jylla u don shibun ki jingeh haba ïaid lynti ban poi shaka thong bad haka jingpule u dei ruh u ba wan kham shadien hynrei kaba sngewtynnad mynta ka long ba kito ki paralok kiba wan shakhmat ban ïa u kin trei pynban hapoh jong u namar u dei ruh uwei naki heh spah bad nongkhaii ba paw ka jylla.
U la sneng bad kyntu ruh ïaki samla pule ha kane ka sngi ba kane ka pyrthei ka dei kaba eh hynrei ki dei ban skhem ka jingmut ban trei shitom bad im ka jingim kaba don akor khnang ba ki briew kin pyrto bad kin longbriew manbriew haka jingim jong ki.