Hadien ba rah ïa ka ICC Women’s World Cup pynbna ka BCCI ïa ka khusnam kaba T.51 klur na ka bynta ka kynhun

New Delhi, Naiwieng 03: Ka khyllipmat kaba kmen tam na ka bynta ka kriket jong ka ri India, ha kaba ka kynhun ïalehkai jong ki kynthei ka la kyntiew ïa ka kyrteng jong ka ha ka histori da kaba jop ïa ka nam lahduh ba nyngkong eh jong ka ha ka ICC Women’s World Cup, hadien ba ka la pynliem noh ïa ka South Africa da 52 ron ha ka phainal ha madan DY Patil ha ka miet jong ka Sngi U Blei (02 tarik Naiwieng).
Ka jingjop kaba la pynkmen ïa ka ri baroh kawei, ha kaba u Secretary jong ka BCCI u Devajit Saikia, ula pynbna ïa ka khusnam pisa kaba T.51 klur na ka bynta ki nongtrei jong ka kynhun, da kaba ïaroh ïa ka jingjop kum ka “jingjop kaba khraw ka ban rah ïa ka kriket jong ki kynthei ha India sha ka kyrdan kaba thymmai.”
Ha kajuh ka por, u chairman jong ka IPL, u Arun Dhumal, u la ïaroh ïa ka jingjop ba pawnam jong ka kynhun, da kaba pynïahap bad ka jingjop ba pawnam jong ka India ha ka World Cup jong ki shynrang ha u snem 1983.
“Ka dei ka sngi kaba kyrpang na ka bynta ka kriket jong ki kynthei India. Kaei kaba ka kynhun jong ki shynrang ka la jop ha u snem 1983, ki kynthei India ki la pynurlong biang mynta ka sngi ha Mumbai. Kane ka jingjop kaba pawnam kan ai jingkyrshan kaba khraw ïa ka kriket jong ki kynthei ha ka ri, bad nga ngeit skhem ba ka jingïalehkai jong ngi mynta kan poi sha ki kyrdan kiba thymmai,” la ong u Dhumal.
Haba shimti ban tied nyngkong, ka India hapoh ka jingïalam jong ka Shafali Verma kaba la kamai 87 ron, ka Deepti Sharma (58 ron), bad ki jingnoh synñiang kiba kordor na ka Smriti Mandhana (45) bad ka Richa Ghosh (34), ka la lah ban kamai 298 ron bad hap 7 wiket naki 50 ober.
Haba beh ïa ka thong kaba 299, ka South Africa lyngba ka Tazmin Brits bad ka Laura Wolvaardt ki la ïatreilang ban kamai sanphew ron. Hynrei ka Amanjot Kaur ka la pynkhyllem noh ïa ka Brits, bad dei hangne ba ka India ka la sdang ban tehlakam hi ïa u thied ban pynïaid ïa ka jingïakhun.
Ka nongkawang bol pace, ka Sree Charani, ka la ïoh ban khur wiket tang mar ïa shimti ïa ka over ba nyngkong jong ka, da kaba pynhap noh lyngba ka LBW ïa ka Anneke Bosch, ha shuwa ba ka Shafali Verma kan tyngshaiñ ha ka bol — da kaba weng noh ïa ka Sune Luus bad ka Marizanne Kapp.
Hadien kane ka Deepti Sharma ka la wanrah ïa ka jingïalehkai kaba kyrpang, da kaba khur 5 wiket na ka bynta 39 ron ban pynkut ïa ki lad ïa ka South Africa. Wat hapdeng ka jingtrei shitom jong ka Wolvaardt, kaba la kamai 101 ron, hynrei ka South Africa ka la shah rem, da kaba kamai 246 ron ha ki 45.3 ron, katba ka India ka la pynthikna ïa ka jingjop kaba pawnam da 52 ron ryngkat ka jingkyrshan kaba jur bha na la ïing.
Ka jingkheiñ kaba lyngkot jong ka jingïakhun:
India 298/7 haki 50 over (Shafali Verma 87 ron, Deepti Sharma 58 ron, Richa Ghosh 34 ron; Ayabonga Khaka khur 3-58) ka la pynliem ïa ka South Africa 246 – khyllem baroh ki wiket haki 45.3 ober (Laura Wolvaardt 101 ron, Annerie Dercksen 35 ron; Deepti Sharma khur 5-39, Shafali Verma khur 2-36) da 52 ron.